Bıyl ınfraqurylymdy damytý aıasynda 14 oblys ortalyǵynda 67 joba iske asady

ASTANA. QazAqparat – 2023 jyly óńirlerdiń ınjenerlik jáne kólik ınfraqurylymyn damytý aıasynda 67 bıýdjettik ınvestıtsııalyq jobany iske asyrýǵa 42,1 mlrd teńge bólindi. Bul týraly Májiliste eldi mekenderge arnalǵan óńirlik standarttar júıesi týraly Úkimet saǵatynda Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Qazirgi kezde mınıstrlik adamdardyń ómir súrý sapasyn arttyrý jáne Óńirlik standarttar júıesiniń kórsetkishterin jaqsartý úshin túrli bıýdjettik baǵdarlamalar aıasynda óńirlerdi damytý jumysyn jalǵastyryp jatyr. Máselen, 2023 jyly óńirlerdiń ınjenerlik jáne kólik ınfraqurylymyn damytý úshin 14 oblys ortalyǵynda 67 bıýdjettik ınvestıtsııalyq jobany iske asyrýǵa 42,1 mlrd teńge bólindi. Osy qarajat boıynsha qala ishindegi 60 shaqyrymǵa jýyq joldy jáne 140 shaqyrym ınjenerlik jelini jańǵyrtý júrgizilip jatyr. Budan basqa, 29 monoqala men shaǵyn qalada 74 jobany júzege asyrýǵa 34,9 mlrd teńge bólindi. Qala ishindegi joldardyń 90 shaqyrymyn jáne ınjenerlik jelilerdiń 180 shaqyrymyn jańǵyrtý josparlanyp otyr», - dedi Á. Qýantyrov.

Sonymen qatar, iri qalalardyń shet aımaqtaryn ınfraqurylymdyq turǵyda damytý úshin 33 jobany iske asyrý josparlanǵan.

«Olardy iske asyrýǵa 41,5 mlrd teńge bólindi. Kórsetilgen qalalarda shamamen 60 shaqyrym jol jáne 160 shaqyrym ınjenerlik jeli jańǵyrtylady», - dedi mınıstr.

Budan buryn habarlanǵandaı, Óńirlik standarttar júıesin ózgeris engizilip, jańa redaktsııada nysandar men kórsetiletin qyzmetterdiń tizbesi aıtarlyqtaı keńeıtildi.