Bıyl HQO qyzmetkerine qol kóterýge qatysty 8 oqıǵa tirkelgen
NUR-SULTAN. QazAqparat - Jyl basynan beri Halyqqa qyzmet kórsetý ortalyqtarynyń qyzmetkerlerine 8 qol kóterý oqıǵasy tirkeldi, dep habarlaıdy QazAqparat tilshisi.
Bul týraly «Azamattarǵa arnalǵan úkimet» memlekettik korporatsııasynyń basqarýshy dırektory Murat Jumanbaı aıtyp berdi.
«Jyl basynan beri Halyqqa qyzmet kórsetý ortalyqtarynda qyzmetkerlerge qol kóterip, kúsh kórsetýdiń 8 faktisi tirkeldi. Bul oqıǵalar boıynsha sotta tergeý amaldary júrip jatyr. Naqty sot sheshimi shyqqan soń qosymsha aqparat beriledi. Atalǵan oqıǵalar Nur-Sultan, Almaty jáne Shymkent qalalarynda boldy. Barlyq 8 oqıǵada naqty qol jumsaý oryn alǵan, odan basqa HQO-na kelip, janjal shyǵaratyn faktiler de jıi tirkeledi», - dedi M. Jumanbaı Ortalyq kommýnıkatsııalar qyzmetinde tilshilerge bergen suhbatynda.
Korporatsııa dırektory Halyqqa qyzmet kórsetý ortalyqtarynda azamattardyń janjal shyǵarý sebepterin aıtty.
«Máselen, HQO qyzmetkerleri belgili bir qujattardy talap etse, azamattar ony tolyq ákelmeıdi. Nemese óz ornyna basqa adamdy jiberedi, onyń senimhaty nemese týystyǵyn rastaıtyn basqa da qujaty bolmaıdy. Soǵan qaramastan, bul azamattar ózine qyzmet kórsetýin talap etedi. Sondaı jaǵdaılarda bizdiń qyzmetkerler zańbuzýshylyqqa bara almaıdy. Olardyń tıisti mindetteri men talaptary bar. HQO qyzmetkeri zańsyz talaptardy oryndamaǵandyqtan azamattar janjal shyǵarady», - dedi M. Jumanbaı.
