Bıyl halyqty sýmen qamtýǵa bıýdjetten 280 mlrd teńge bólingen

ASTANA. QazAqparat – Bıyl halyqty sýmen jabdyqtaý jumysyna el bıýdjetinen 280 mlrd teńge bólindi. Bul týraly QR IIDM Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Ázimbek Pazylbekuly aıtty, dep habarlaıdy QazAqparat tilshisi.

«Qazaqstan qalalary boıynsha halyqtyń 98,4 paıyzy sýmen qamtamasyz etilgen, onyń ishinde SQO, Mańǵystaý, Atyraý,Qyzylorda, Jetisý, BQO, Ulytaý, Aqtóbe, Almaty oblystarynda qala halyqtary tolyqqandy sýmen qamtylǵan. Qalalarda aýyz sýmen qamtýdyń eń tómen deńgeıi Jambyl oblysynda (91,9%), Abaı oblysynda (92,8) jáne Aqmola oblysynda (95,3) baıqalady», - dedi Á. Pazylbekuly ortalyq kommýnıkatsııalar qyzmetinde ótken baspasóz máslıhatynda.

Óz kezeginde aýyl halqynyń 94,5 paıyzynda sý bar.

Eń tómengi kórsetkishter – Qostanaı oblysynda – (80,4%), Aqmola oblysynda (89,8%) jáne Soltústik Qazaqstan oblysynda (85%).

«Prezıdent atap ótkendeı, «Elimizdiń ártúrli óńirleriniń turǵyndary taza aýyz sýǵa, tabıǵı gazǵa, kólik ınfraqurylymyna qoljetimdiliktiń ártúrli deńgeıde qamtylǵan. Bul teńsizdikti joıý boıynsha jumysty jandandyrý qajet». Bıyl sýmen jabdyqtaý jáne sý burý júıelerin salýǵa jáne rekonstrýktsııalaýǵa respýblıkalyq bıýdjetten 402 jobany iske asyrýǵa 280 mlrd teńge bólindi, onyń ishinde qalalarda 135 jobany iske asyrýǵa 167 mlrd teńge jáne aýyldarda 267 jobany iske asyrýǵa – 113 mlrd teńge bólindi», - dedi komıtet ókili.

Bul rette sýmen qamtý kórsetkishteri tómen óńirlerge qarajat basymdyqpen beriledi.

Buǵan deıin spıker Qazaqstan halqynyń 96% aýyz sýmen qamtylǵanyn, 2025 jyly bul kórsetkish 100% jetetinin aıtqan edi.