Bıyl halyq kompozıtory Qurmanǵazy Saǵyrbaıulynyń týǵanyna – 205 jyl

ALMATY. QazAqparat – Ulttyq dombyra kúni men halyq kompozıtory Qurmanǵazy Saǵyrbaıulynyń 205 jyldyǵy qarsańynda birqatar aýqymdy is-shara uıymdastyrylmaq. Bul týraly Óńirlik kommýnıkatsııalar qyzmetiniń brıfınginde Qurmanǵazy atyndaǵy qazaq ulttyq halyq aspaptar orkestriniń dırektory Medet Qýanyshev pen bas dırıjer Abylaı Tilepbergen málimdedi, dep habarlaıdy QazAqparat tilshisi.

«Osy jyldy biz Qurmanǵazy Saǵyrbaıulynyń 205 jyldyǵyn merekeleýden bastadyq. Ulttyq jáne álemdik klassıka týyndylary, sondaı-aq mýzyka sheberi, halyq kompozıtory Qurmanǵazynyń úzdik týyndylary oryndalǵan aýqymdy kontsert uıymdastyryldy. Árbir uıymdastyrylǵan is-shara Qurmanǵazy Saǵyrbaıulynyń 205 jyldyǵy men ulttyq orkestrdiń 90 jyldyǵyn merekeleý aıasynda ótip jatyr», – dedi Medet Qýanyshev.

Onyń aıtýynsha, kontserttik maýsymdy shyǵarmashylyq ujym Italııada bastady. «Biz 90-shy maýsymdy Rımdegi (Italııa) halyqaralyq gastroldik kontsertimizben ashtyq. Rımnen basqa biz Neapol men Florentsııa qalalaryna bardyq. Jergilikti kórermender qazaq mýzykasynyń erekshe dámine tánti bolyp, jyly lebizi men quttyqtaýyn bildirdi», - dedi ol.

Ulttyq dombyra kúninde (bıyl 2 shildede atap ótiledi) orkestr respýblıka astanasynda uıymdastyrylatyn is-sharalarǵa qatysady. Orkestr ujymyndaǵylar eki mereıtoıdy eskere otyryp, arnaıy qoıylymdar daıyndalatynyn atap ótti.

«Bıyl Dombyra kúnine arnalǵan kontserttik baǵdarlama Qurmanǵazy atyndaǵy orkestr men N.Tilendıev atyndaǵy «Otyrar sazy» akademııalyq orkestriniń qatysýymen ótedi. Kórermender elimizde tanymal dırıjerlerdiń jetekshiligimen tanymal ártisterdiń, sonyń ishinde Aıtqalı Jaıymov, Dinzýhra Tilendıeva, Rýslan Baımýrzın jáne basqalardyń ónerin tamashalaı alady. Baǵdarlamanyń basty erekshelikteriniń biri solaqaı dombyrashylardyń óner kórsetýi bolady. Óıtkeni ádette bul aspapta oń qolmen oınaıdy. Sondaı-aq Halyq ártisteri Seken Turysbekov, Erlan Rysqalı jáne Aıgúl Qosanova óner kórsetedi dep josparlanǵan», - dedi orkestrdiń bas dırıjeri Abylaı Tilepbergen.

Sonymen qatar, shyǵarmashylyq ujym alǵashqy ulttyq orkestrdiń tarıhyn baıandaıtyn birqatar beınematerıal men kitap shyǵarýǵa nıetti.

«Biz orkestrdiń ǵasyrlyq tarıhyn ártúrli beınematerıaldarda, kitap basylymdarynda túsirip, orkestrdiń búginge deıingi damý tarıhy jaıly aıtyp bergimiz keledi. Bastaýynda turǵan mýzykanttarmen, dırıjerlermen tanystyrsaq deımiz. Qazir biz muraǵattyq materıaldarmen jumys istep jatyrmyz. Kontserttik ómirden bos ýaqytty osy jumysqa arnaımyz», - dedi spıker.

Aıta keteıik, Qurmanǵazy atyndaǵy Qazaq ulttyq halyq aspaptar orkestrin 1934 jyly akademık Ahmet Jubanov qurdy. Ujymda búginde 90-ǵa jýyq mýzykant óner kórsetedi. Olardyń repertýarynda 4 000 týyndy bar.