Bıyl ǵylym týraly zańnamaǵa ózgerister engiziledi - mınıstrlik

NUR-SULTAN. QazAqparat – Búgin Memleket basshysynyń Joldaýynda berilgen tapsyrmalardy oryndaýǵa arnalǵan Úkimet otyrysynda Bilim jáne ǵylym mınıstri Ashat Aımaǵambetov ǵylym týraly zańnamaǵa ózgerister engiziletinin aıtty, dep habarlaıdy QazAqaparat tilshisi.

«Ǵylymdy damytý boıynsha Memleket basshysy óte mańyzdy tapsyrmalardy berdi. Bul bastamalar elimizdiń ǵalymdarynyń kópten beri kóterip júrgen aýqymdy problemalardy sheshetin bolady. Ol úshin eń aldymen ǵylym týraly zańnamaǵa aǵymdaǵy jyldyń sońyna deıin qajetti ózgeristerdi engizemiz. Zań jobasy daıyn», - dedi A. Aımaǵambetov.

Olardyń negizgileri:

- bazalyq qarjylandyrýǵa jetekshi ǵalymdardyń jalaqysyn engizý;

- arnaıy irikteý krıterııleri boıynsha irgeli zertteýlermen aınalysatyn ǵylymı-zertteý ınstıtýttardy tikeleı qarjylandyrý;

- granttyq qarjylandyrý merzimin 3 jyldan 5 jylǵa deıin ulǵaıtý jáne Ulttyq ǵylymı keńesterdiń sheshimderine apellıatsııa ınstıtýtyn engizý máseleleri sheshiletin bolady.

Budan buryn habarlanǵandaı, Bilim mınıstri 1 myń jańa mektepti salý qadamdaryn túsindirdi.