Bıyl geologııalyq barlaý baǵdarlamasy bekitiledi
«Munaı-gaz salasynda ınvestıtsııa tartýdy jaqsartyp, resýrstyq bazany ulǵaıtý úshin zańnamalyq reformalar júzege asyryldy. Salyq kodeksi men Jer qoınaýy jáne jer qoınaýyn paıdalaný kodeksiniń normalary iske qosylyp, qazirdiń ózinde óz nátıjesin berýde. Sonymen qatar, Indýstrııa jáne ınfraqurylymdyq damý mınıstrligimen birlesip jer qoınaýynda jetkiliksiz zerttelgen ýchaskelerdiń áleýetin baǵalap jatyrmyz. Bul is-sharalar Aral, Shý-Sarysý, Syrdarııa, Soltústik Torǵaı, Teńiz, Soltústik Qazaqstan, Ertis, Balqash, Іle, Alakól, Zaısan shógindi basseınderinde júrgizilýde», - dedi ol.
Mınıstrdiń aıtýynsha, bıyl osyndaı ýchaskelerge geologııalyq zertteýdiń kólemin baǵalaý men olardy qarjylandyrý mólsherin anyqtaý úshin taldaý júrgizilmekshi.
«Osy taldaý negizinde 2021-2025 jyldarǵa arnalǵan Geologııalyq barlaý baǵdarlamasyn ázirlep, osy jyldyń sońyna deıin bekitemiz. Orta merzimdi perspektıvada geologııalyq barlaýdy belsendi iske qosý jáne jaqsartýdyń basym mindeti osyndaı. Álginde aıtqanymdaı, bıyl munaı óndirý kólemi 89 mln tonna dep josparlanyp otyr. 3 iri ken ornynyń úlesi 53,5 mln tonnany quraıtyn bolady. Bul 2018 jylǵa qaraǵanda shamamen 1 paıyzǵa nemese 438 myń tonnaǵa az», - dedi Q.Bozymbaev.
Onyń sózine qaraǵanda, bul tómen kórsetkish Qarashyǵanaq, Teńiz jáne Qashaǵanda ótetin josparly kúrdeli jóndeý jumystaryna baılanysty.
«Osyǵan oraı, bıyl Qarashyǵanaqta munaı óndirý kólemi 11 mln tonnany quramaq. Bul 2018 jylmen salystyrǵanda 1 mln 200 myń tonnaǵa tómen. Alaıda, Qashaǵan men Teńizde óndiriletin munaı kólemi tómendemeıdi. 2018 jyldyń kóleminen asyramyz dep josparlap otyrmyz», - dedi ol.
