Bıyl gemodıalız seanstarynyń sany boıynsha halyqaralyq standarttarǵa qol jetti - Medıtsınalyq qyzmetke aqy tóleý komıtetiniń ókili
ASTANA. 23 qarasha. QazAqparat - Bıyl gemodıalız seanstarynyń sany boıynsha halyqaralyq standarttarǵa qol jetti.
Bul týraly búgin Densaýlyq saqtaý mınıstrliginde ótken baspasóz máslıhatynda Medıtsınalyq qyzmetke aqy tóleý komıtetiniń ókili Naǵıma Nyǵmanova málim etti.
«Densaýlyq saqtaýdyń Biryńǵaı ulttyq júıesi engizilgenge deıin jeke sektorda tek bir ǵana ambýlatorlyq gemodıalız jetkizýshisi qyzmet kórsetip kelgen edi. Al 2012 jyly elimizde bundaı tasymaldaýshynyń sany 43-ke jetse, onyń 16-sy jeke sektordyń úlesine tıip otyr. Eger 2010 jyly jekemenshik klınıkalarda gemodıalız boıynsha barlyǵy 192 naýqas emdelse, 2012 jyly olardyń sany 1287-i qurady», -deıdi Naǵıma Nyǵmanova.
Onyń aıtýynsha, buǵan eń aldymen memlekettik jáne jeke menshik sektor arasynda kepildendirilgen tegin medıtsınalyq kómek aýqymy úshin teńdeı jaǵdaı jasaý arqyly qol jetip otyr. «Bul rette memlekettik emes sektordyń qyzmettegi úles ósimi 17 paıyzǵa deıin artty», - dedi ol.
