Bıyl Eýroodaq elderine qýańshylyq qaýpi tónip tur
ASTANA. QazAqparat – Qurǵaqshylyqtan kóbine Eýropa Odaǵynyń ońtústiktegi elderi – Ispanııa, Portýgalııa men Frantsııa zardap shegip otyr, al Italııada oǵan qosa sý tasqyny bolyp jatyr. Topyraqtaǵy ylǵal Baltyq pen Skandınavııada da azaıyp ketti, dep habarlaıdy QazAqparat Euronews agenttigine silteme jasap.
Ońtústik Eýropa kúnniń ysýyna jáne qýańshylyqtyń kúsheıetinine daıyndalyp jatyr. Ol elderdiń aýyl sharýashylyǵyna keri áserin tıgizedi. Eń kóp zardap shekken Eýroodaqqa múshe elder ózderine qarjylaı kómek kórsetýdi, naqtyraq aıtqanda qıyn kezeńde fermerlerge kómek kórsetýge arnalǵan «Agrarlyq rezervten» 450 mıllıon evro kóleminde qarjy bólýdi surap jatyr.
Osyndaı kezeń kelgenin Ispanııa aýylsharýashylyq, balyq aýlaý jáne azyq-túlik mınıstri Lýıs Planas Pýchades málimdedi:
«Bıyl biz Ispanııada gıdrologııa jyly bastalǵaly jaýyn-shashyn mólsheri 30%-ten astam azaıǵanyn baıqadyq. Bul jaıylym jerlerdegi maldardy jem-shóppen qamtamasyz etýge, qysqa arnalǵan eginge, jazdyq eginge de keri áser etedi. Sý kúshi azaıǵandyqtan sýarý da qıyn bolady».
Brıýsseldegi mınıstrlik kezdesýinde Frantsııa, Italııa men Ispanııanyń atynan Portýgalııa usynǵan baıandama jaǵdaıdyń qıyn ekenin kórsetti. Sáýirdiń sońynda Eýroodaqtyń 21,6% aýmaǵy «qýańshylyq týraly eskertý» rejıminde, al 3,2%-i «dabyl» jaǵdaıynda boldy.
Jaýyn-shashynnyń bolmaýynan Ispanııa men Portýgalııa qatty shyǵynǵa batty. Baltyq pen Skandınavııa elderinde topyraqtaǵy ylǵal mólsheri ádettegiden azaıyp ketti.
Ispanııada 2022 jyldyń 1 qazany men 2023 jyldyń 25 sáýiri aralyǵynda jaýyn-shashyn jetispeýshiligi kólemi ortasha esepten 24%-ke tómendegen, al Frantsııada 101 departamenttiń 26-y jaz sońynda qýańshylyqqa tap bolýy múmkin. Ol Portýgalııanyń 40%-ten astam qurlyq aýmaǵyndaǵy aýylsharýashylyǵy qyzmetine keri áser etti.
Italııada qýańshylyqpen qatar sý tasqyny da mal sharýashylyǵy, júzim ósirý, dándi daqyldar, jemis-jıdek óndirýge zııanyn tıgizip jatyr. Sonymen qatar ózen atyraýyndaǵy aǵynnyń azaıýy saldarynan teńizden tuzdy tanap kóterilip, sý aýylsharýashylyǵy qajeti úshin jaramsyz bolyp qalady.
