Bıyl eski kóligin ótkizgen qazaqstandyqtarǵa 7 mlrd teńgege jýyq qarajat tólendi
NUR-SULTAN. QazAqparat – ÓKM Operatory tozǵan kólik quraldary men aýylsharýashylyǵy tehnıkasyn qaıta óńdeýge tapsyrý baǵdarlamasynyń bıylǵy qorytyndysyn jarııalady, dep habarlaıdy QazAqparat tilshisi ÓKM Operatorynyń baspasóz qyzmetine silteme jasap.
2020 jyly qabyldaý beketteri 41 262 eski kólikti qabyldap, tehnıkasyn joıýǵa tapsyrǵandarǵa berilgen 7 mlrd teńge tólegen. Sondaı-aq eski kóligin ótkizgenderge 8 651 myń jeńildik sertıfıkaty tabystalǵan.
Jalpy bıyl jeńil avtokólikter úshin aqshalaı tólem mólsheri ulǵaıtylyp, aılyq eseptik kórsetkishke baılanysty tólene bastaǵanyn aıta ketý kerek. Maýsym aıynan bastap jeńil kóligin ótkizgenderge 150 myń teńgeniń ornyna 200 myń teńge (72 AEK) berildi. Tolyq emes jıyntyqtaǵy mashına úshin tólem mólsheri 48 myńnan 150 myń teńgege deıin ulǵaıdy.
«2020 jyldyń 2 qarashadan bastap ÓKM Operatory isten shyqqan aýyl sharýashylyǵy tehnıkasyn kádege jaratýǵa qabyldaýdyń pılottyq baǵdarlamasyn iske qosty. Tapsyrylǵan eski kombaındar men traktorlardyń ornyna jeńildik sertıfıkattary berildi. Jeńildik sertıfıkatynyń nomınaly aýyl sharýashylyǵy tehnıkasynyń túri men jıyntyǵyna baılanysty 560 myń teńgeden 2 mıllıon teńgege deıin baǵalandy. Pılottyq joba aıasynda 100 traktor men 20 kombaın qabyldanyp, baǵdarlamaǵa bólingen kvota merziminen buryn ıgerildi», - delingen habarlamada.
Eski kólikterdi qaıta óńdeýge qabyldaý baǵdarlamasy keler jyly da jalǵasyn tabady. 2021 jyly tozyǵy jetken 45 myń kólik, sondaı-aq 2380 birlik aýylsharýshylyq tehnıkasyn qabyldaý josparlanyp otyr. Elektrondy kezek qańtar aıynda ashylady.
