Bıyl erekshe qorǵalatyn aımaqqa 600 dýadaq jiberiledi - QR AShM
ASTANA. 14 qyrkúıek. QazAqparat - «Bıyl 600 dýadaq erekshe qorǵalatyn aımaqqa jiberiledi.
Bul týraly búgin QR Aýyl sharashylyǵy mınıstrliginiń alqa májilisinde vedomstvoǵa qarasty Orman jáne ańshylyq sharýashylyǵy komıtetiniń tóraǵasy Erlan Nysanbaev málim etti.
Joǵalý qaýpi bar qustardy saqtaý jáne olardyń sanyn kóbeıtý boıynsha halyqaralyq yntymaqtastyq aıasynda jumystardyń qolǵa alynǵandyǵyn atap ótken ol: «Shymkent qalasynda jobalyq qýaty jylyna 5 myń dýadaqty tabıǵat aıasyna jiberýge múmkindik beretin dýadaq ósirý ortalyǵynyń qurylysy júrgizilýde», - dedi.
Onyń sózine qaraǵanda, 2013 jyly osy ortalyqta ósirilgen 100 dýadaq tabıǵat aıasynda jiberiletin bolady. Al aǵymdaǵy jyly Birikken Arab Ámirliginen jetkizilgen 107 dýadaq erkindikke jiberilgen. Bul qustardyń tirshilik etý ortasyn aıqyndaý úshin olarǵa arnaıy spýtnıktik radıo habaryn beretin qurylǵy baılanǵan.
«Aǵymdaǵy jyly taǵy da 600 dýadaqty erekshe qorǵalatyn aımaqqa jiberý josparlanyp otyr», - dedi E.Nysanbaev.
