Bıyl energetıka salasyn damytý tujyrymdamasy qabyldanady

NUR-SULTAN. QazAqparat - Otandyq energetıka júıesiniń damý perspektıvasy «Qazaqstannyń 2035 jylǵa deıingi energetıkalyq balansy» atty qujatta kórsetilgen. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Energetıka salasyn damytýdyń uzaqmerzimdi strategııasyn ázirleý boıynsha mınıstrlik bıyl 24 naýryzda manevrlik qýat pen jańartylatyn energııa kózderiniń sanyn ulǵaıtýdy kózdeıtin, sondaı-aq kórshi elderdiń energetıkalyq júıesiniń damýyn eskeretin «Qazaqstan Respýblıkasynyń 2035 jylǵa deıingi energetıkalyq balansyn» bekitti», - deıdi Álıhan Smaıylov depýtattyq saýalǵa bergen jaýabynda.

Onyń aıtýynsha, energobalans ishki jáne syrtqy faktorlardy eskere otyryp, Qazaqstannyń energııa júıesin perspektıvalyq damytý boıynsha kontseptsııalyq kózqarasty qalyptastyrýǵa, energııa júıesiniń turaqty jumys isteýi úshin qajet orta jáne uzaqmerzimdi sharalardy ázirleýge múmkindik berdi.

«Sondaı-aq, Memleket basshysynyń tapsyrmasyna sáıkes Úkimet 2060 jylǵa deıingi kezeńdi qamtý múmkindigimen 2035 jylǵa deıin elektr energetıkasy salasyn damytý tujyrymdamasyn ázirlep jatyr. Atalǵan qujatty bıyl qazan aıynda qabyldaý josparlanyp otyr», - deıdi Úkimet basshysy.