Bıyl eń kóp qoldan jasalǵan banknotalar 2000 jáne 10 000 teńgelik bolyp otyr – Ulttyq bank
Bul 2021 jyldyń osy kezeńimen salystyrǵanda 55%-ǵa az (457 jalǵan aqsha belgisi tárkilendi), dep habarlaıdy QazAqparat QR Ulttyq banki banknottar men monetalardy saraptaý basqarmasynyń bastyǵy Asqat Muqamadıevtiń túsindirmesine silteme jasap.
Atalǵan qujatta bıyl nomınaly 2 000 teńgelik banknotalar qoldan kóp jasalǵany (161 dana) aıtylǵan. Bul jalpy sannyń 64%-y. Odan keıingi oryndarda nomınaly 10 000 teńgelik – 27 dana (11%), 5 000 teńgelik – 24 dana (9%) jalǵan banknotalar tur, qalǵan 16%-y – basqa nomınaldarǵa tıesili.
Qoldan jasalǵan aqshalardyń kóp bóligi Almatyda tárkilendi – 126 dana (50%), Shyǵys Qazaqstan oblysynda – 59, Astanada – 22 dana.
Qazaqstanda jalǵan banknotalar kóp jaǵdaıda kompıýterlik tehnıka men kádimgi ofsettik qaǵazda túrli tústi prınterdiń kómegimen jasalady. Aqshany qoldan jasaýshylar kórneki qorǵanysh elementterin túpnusqaǵa meıilinshe uqsatýǵa tyrysady.
QUB naqty banknotalardy jalǵan aqshadan kez kelgen adamǵa óz betinshe ajyratýǵa kómektesetin qarapaıym erejesi baryn eske salady.
Barlyq banknotada kórý qabileti nashar adamdarǵa arnalǵan, qolmen ustaǵanda jaqsy bilinetin shyǵyńqy joǵary bederli element túrinde belgiler bar.
Banknotanyń túsi anyq ári aıqyn bolýǵa tıis, sý tańbasy men nomınaldyń tsıfrlyq beınesin kórý úshin banknotany jaryqqa ustap qaraǵan durys.
Banknota betindegi úzik-úzik túrinde shyǵatyn jazbalary bar jipke nazar aýdaryńyz, ony jaryqqa tosyp qaraǵanda birtutas jip bolyp anyq kórinedi.
Nomınaly 1 000, 2 000, 5 000, 10 000 jáne 20 000 teńgelik banknotalarda túrli tústi boıaýmen salynǵan sýret túrindegi beıneler bar ekenin atap ótken jón. Banknotanyń kólbeý buryshyn ózgertken kezde beıneler túsi jasyl tústen altyn túske deıin ózgeredi.
Sondaı-aq, barlyq banknotada beder jasaıtyn arnaıy baspa bar.
2022 jylǵy úlgidegi nomınaly 20 000 teńgelik banknotadan jarty terezedegi golografııalyq jolaqty kórýge bolady. Jolaqtyń tús almasý jáne dınamıkalyq áserleri bar.
Banknotalardy tekserýge birneshe mınýt ýaqyt ketedi, esesine, kez kelgen adamǵa aqsha belgisiniń qanshalyqty túpnusqa ekenin anyqtaýǵa kómektesedi. Qoldan jasalǵan aqshany túpnusqadan qalaı ajyratýǵa bolatyny týraly tolyǵyraq málimetpen QUB saıtynan tanysýǵa bolady.
Aıta keteıik, qazaqstandyq teńge álemde qoldan jasaýdan erekshe qorǵalǵan valıýtalardyń biri. QUB jańa banknotalardy shyǵarý kezinde qorǵaý elementteri salasyndaǵy jańa ázirlemelerdi jetildirý jáne paıdalaný turǵysyndaǵy jumystardy udaıym júrgizip otyrady.
