Bıyl elordanyń úsh aýdanynda «Trekan» qar eritý qurylǵylary ornatylady
ASTANA. QazAqparat - Búgin Astana qalasynyń ákimi Ádilbek Jaqsybekov kommýnaldyq tehnıkanyń qys maýsymyna daıyndyǵyn tekserdi.
Bul týraly elorda ákimdiginiń resmı saıtynan habarlady.
«Saryarqa», «Almaty», «Esil» aýdandary ákimderiniń jasaǵan esebine saı, qazirgi tańda qala qys maýsymyna tolyqtaı daıyn. Sapaly jumysty uıymdastyrý úshin elordanyń barlyq úsh aýdanynda qalany qys maýsymyna daıyndaý jumystarynyń kestesi men birqatar sharalar ótkizilgen. «Astana - Zelenstroı» men «Astana Tazalyq» kommýnaldyq qyzmetteriniń dıspetcherlik qyzmetteri táýlik boıy jumys isteıdi.
«Astana Tazalyq» tarapynan qala kósheleri men joldaryn qardan tazalaý jumystaryna 253 dana tehnıka jumyldyrylady. Odan bólek, qys maýsymyna ózge mekemelerdiń tehnıkasy tartylmaq. Aı saıyn sanıtarlyq tazalaý jumystaryna qosymsha 200 dana tehnıka tartylady. Sonymen qatar, bıylǵy jyly elordanyń úsh aýdanynda ornatylatyn «Trekan» qar eritý qurylǵylaryn engizý boıynsha pılotty joba júzege asyrylmaq.
Qys maýsymynda qar tazalaý jumystaryn júzege asyrý úshin «Astana Zelenstroı» 120 dana mamandandyrylǵan tehnıka bóledi. Qazirgi ýaqytta kólik-traktorly park qys maýsymyna tolyqtaı daıyn.
Atalmysh eki kommýnaldyq kásiporynnan ózge aýdan ákimdikteri qalany qardan tazalaý jumystaryna merdiger mekemelerdi de tartady. Atap aıtqanda, «Almaty» aýdanynda 230 dana, «Esil» 307 dana, «Saryarqa» 161 dana tehnıka.
Tekseris kezinde Astana qalasynyń ákimi kommýnaldyq tehnıkalar men qalanyń tıisti qyzmetteriniń elordanyń ınfraqurylymy úzilissiz jumys isteýi úshin qys maýsymyna tolyqtaı daıyn ekendikterin kórdi.
Tekserý aıasynda qala basshysy «Asia Park» OSO janynda ornalasqan jańa jyly avtobýs aıaldamasyn kórip shyqty. Qazirgi ýaqytta pılotty nysandy ornalastyrý boıynsha jumystar aıaqtalyp qaldy.
Jolaýshylardyń yńǵaılylyǵy úshin jańa jabyq tıptegi aıaldama keshenderi aqparattandyrý, jylytý jáne ventılıatsııa júıelerimen qamtamasyz etilgen. Nysandy jylytý úshin qys maýsymynda baqylaý qurylǵylary bar ınfraqyzyl jylytqyshtar paıdalanylady. Jolaýshylardyń qaýipsizdigi úshin, sonymen qatar, keshendi tirshilikti qamtamasyz etý júıesine qosylǵan beıne baqylaý júıesi de ornatylady.
Barlyǵy 80-nen astam jolaýshylar kóp shoǵyrlanatyn aımaq anyqtaldy. 2015 jyldyń sońyna deıin solardyń 30-ǵa jýyǵy jańa keshendermen qamtylady dep kútilýde. Jabyq tıptegi aıaldama kesheni orta eseppen kem degende 20-30 adamdy syıdyra alady.
