Bıyl elordanyń sol jaǵalaýynda qansha mektep salynady
NUR-SULTAN. QazAqparat - Elordanyń sol jaǵalaýynda bıyl 4 memlekettik mektep salynady. Bul týraly Nur-Sultan qalasy Esil aýdanynyń ákimi Berik Jákenov aıtty, dep habarlaıdy QazAqparat tilshisi.
«Bıyl Esil aýdanynda 4 memlekettik mektep ashylady. Qazirgi ýaqytta qurylys jumystary qarqyndy júrgizilip jatyr. 2 mektep 1 qyrkúıekke deıin, al taǵy 2-eýi jyldyń sońyna deıin paıdalanýǵa beriledi. Memlekettik-jekeshelik áriptestik arqyly da mektep salý boıynsha qarqyndy jumys júrgizilýde. Atalǵan baǵdarlama aıasynda qurylysy júrgiziletin 10 mekteptiń beseýi sol jaǵalaýda salynady», - dedi ol Facebook-tegi Astananyń adaldyq alańy paraqshasynda ótken onlaın brıfıng barysynda
Onyń atap ótýinshe, memlekettik-jekeshelik áriptestik aıasynda josparlanǵan mektepterdiń biri Úrker shaǵyn aýdanynda, al qalǵan 4-eýi Esil aýdanynyń ár jerinde boı kóteredi.
«Olar biregeı, jańa formatta salynatyn bolady jáne 2 myńǵa deıingi aralyqta orynǵa shaqtalǵan. Family Village turǵyn úı kesheni tusyndaǵy 1 200 oryndyq mektepti paıdalanýǵa berip, jol túsirdik. Ol ótken jyldyń qarashasynda ashylǵanmen kólik qatynaýy qıyndyq týyndatqan edik. Sondyqtan bul bilim ordasy bıyl tolyqqandy jumysyn bastaıdy. Syǵanaq-Saýran kósheleriniń, Qorǵaljyn tas joly men Shyńǵys Aıtmatov kóshesi qıylysyndaǵy mektepterdi de bıyl salyp bitirýdi josparlap otyrmyz. Saran shaǵyn aýdanynda da mektep salynady. Biraq, naqty merzimin aıta almaımyn. Ókinishke oraı, paıdalanýǵa berilý merzimi sozylyp barady. Degenmen, merdiger jeltoqsanǵa qaraı bitiretindigine ýáde berip otyr», - dedi Berik Jákenov.
