Bıyl elordadaǵy psıhıkalyq densaýlyq ortalyǵynda 164 nashaqor emdeldi

ASTANA. QazAqparat – Bıyl psıhıkalyq densaýlyq ortalyǵynda esirtkige táýeldi 164 adam em aldy. Bas shahardyń maslıhatynda baıandama jasaǵan Astana qalalyq Qoǵamdyq densaýlyq saqtaý basqarmasy basshysynyń mindetin atqarýshy Berik Qaıkenov osylaı málim etti, dep habarlaıdy QazAqparat.

«Qalalyq psıhıkalyq densaýlyq ortalyǵy júıeli túrde profılaktıkalyq jumystar júrgizýde. Osylaısha, bıyl ortalyqta esirtkige táýeldi 164 adam emdeldi. Onyń ishinde apıyn qoldanǵan 54 azamat bar. Taldaý kórsetkendeı, táýeldilerdiń jasy 25-39 aralyǵynda», - dep toqtaldy Berik Qaıkenov.

Basqarma basshysynyń mindetin atqaýshy elordalyq dárihanalar arqyly kúshti áser etetin preparattardyń taralýy azaımaı turǵanyn atap ótti.

«Keıbir adamdar dári-dármekterdi dárigerdiń nusqaýynsyz, jalǵan retseptterdi qoldana otyryp satyp alady. Sonymen qatar, patsıentterdiń kóbi dárini durys qoldanýdy bilmeıdi.

Qazirgi ýaqytta 75 patsıent pallıatıvtik kómekke muqtaj. Atap aıtqanda, olar tramadol, ınektsııaǵa arnalǵan eritindi, sýppozıtorıı, fentanıl, transdermaldy sıstema sııaqty preparattardy qajet etedi. Olar 4 aı ishinde tegin medıtsınalyq kepildendirilgen kómek sheńberinde jalpy somasy 9,8 mln teńge bolatyn esirtki jáne psıhotroptyq preparattarmen qamtamasyz etildi. Ótken jyldyń qorytyndysy boıynsha mundaı dárilerge muqtaj naýqastarǵa 27 mln teńgeniń preparaty tegin berildi», - dep túıindedi Berik Qaıkenov.