Bıyl elordadaǵy bıznes sýbektileri 598 mlrd teńge salyq tólegen
«Bıyl ónerkásip salasy ótken jylmen salystyrǵanda 3,7%-ǵa ósti. Qaladaǵy óndirýmen aınalysatyn kásiporyndar osy jyldyń 11 aıynda 1,7 trln teńgeniń, al óńdeý ónerkásipteri 1,5 trln teńgeniń ónimin shyǵardy. 2021 jyldyń sáıkes kezeńimen salystyrǵanda, bul – 414,9 mlrd teńgege artyq», - dedi Shýhrat Joraev.
Onyń aıtýynsha, Astanada 441 myń adam qyzmet etip júrgen 201 myń shaǵyn jáne orta bıznes sýbektisi bar. Bıyl olardyń salyqtary men ózge de tólemderinen bıýdjetke 598 mlrd teńge túsken.
«Astanada iri jobalardy júzege asyrýdyń barlyq bazasy qalyptasqan. Mysaly, barlyq qajetti jaǵdaılary bar, daıyn ınjenerlik alańdy qamtıtyn №1 Indýstrıaldy park bar. Memleket ınfraqurylymdy salýǵa 23,9 mlrd teńge ınvestıtsııalady, al ınvestorlar 169 mlrd teńge salyq tólegen. Osylaısha, ınfraqurylym 7 ese ózin aqtaǵan. Indýstrıaldy parktiń arqasynda búginde qalada elimizde balamasy joq 100-ge jýyq taýar túri shyǵarylady. Bul – asyl metaldardy tazartý, temir jol tehnıkasy, sondaı-aq elektrondy-optıkalyq qurylǵylar», - dedi Shýhrat Joraev.
Onyń aıtýynsha, búginde ındýstrııalyq parkte 94 joba iske asyrylyp jatyr. Qazirgi tańda onyń 49-y paıdalanýǵa berilse, qalǵan 45 joba iske asyrýdyń belsendi kezeńinde. Sondaı-aq, ol jyl sońyna deıin Astanada 600-den asa adamdy jumyspen qamtıtyn úsh iri joba iske qosylatynan atap ótti.
«Olar – medıtsınalyq maska óndirý zaýyty. Oǵan baǵyttalǵan ınvestıtsııa kólemi – 2,1 mlrd teńge. Buǵan qosa, metall ónimderin, terezelerdi, vıtrajdardy, medıtsınalyq jabdyqtar men medıtsınalyq jıhazdardy óndiretin ıntegratsııalanǵan óndiristik kesheni iske qosylady. Investıtsııa kólemi – 22 mlrd teńge. Taıaýda qurylys materıaldaryn óndiretin seriktestik te óz jumysyn bastaıdy. Zaýytqa quıylǵan ınvestıtsııa – 0,8 mlrd teńge», - dep túıindedi ol.
