Bıyl elordada jastarǵa tabystalatyn páter sany belgili boldy

NUR-SULTAN. QazAqparat – Bıyl elordada jumysshy jastarǵa 350 páter tabystalady. Bul týraly Nur-Sultan qalasy Jastar saıasaty basqarmasynyń basshysy Dáýlet Káribek málim etti, dep habarlaıdy QazAqparat tilshisi.

«Ózderińizge málim, Jastar jylynyń saltanatty ashylý sharasynda Qazaqstan Respýblıkasynyń Tuńǵysh Prezıdenti- Elbasy Nursultan Nazarbaev jumysshy jastarǵa satyp alý quqyǵynsyz jalǵa páterler berý týraly tapsyrma bergen bolatyn. Elbasynyń tapsyrmasyn 2019 jyly Nur-Sultan qalasynyń ákimdigi tarapynan jumysshy jastarǵa 1050 páterdiń kiltin tabystadyq. Elimizde oryn alǵan pandemııa jaǵdaıyna baılanysty bıyl 350 páterdi jastarǵa tabystaý josparlanyp otyr», - dedi D. Káribek.

Bul jobanyń negizgi maqsaty – aldaǵy 5 jyl ishinde jastar óz qarajattaryn jınaqtap, jeke úılerin satyp alýǵa baǵyttalǵan memlekettik joba. Negizgi mindet — jumysshy jastardy qoldaý.

«Munda bes negizgi qaǵıdaǵa súıene otyryp irikteledi: jasy 29 jastan aspaǵan, jumys isteıtin, óz menshiginde baspanasy joq, jınaq jasaý úshin depozıttik shoty bolýy kerek, sonymen qatar sońǵy 6 aıda keminde 111 120 teńge, ıaǵnı 40 AEK kirisi bar bolýy kerek. Jumysshy jastarǵa óziniń jekemenshik páterlerine ıe bolýda atalǵan joba orasan zor septigin tıgizedi dep oılaımyn. Sondyqtan, jastarǵa qajetti qujattardy jınaqtap, belsendi túrde qatysýǵa, óz múmkindigin jiberip almaýǵa keńes beremin», - dedi Dáýlet Káribek.