Bıyl elordada týberkýlezden 8 adam ajal qushty
NUR-SULTAN. QazAqparat – Bıylǵy jyldyń toǵyz aıynda elordada 8 adam týberkýlezden kóz jumdy. Búginde 900 adam atalǵan syrqattan emdelýde. Bul týraly búgin «Qalalyq ftızıopýlmonologııalyq ortalyǵy» memlekettik kommýnaldyq kásipornynyń bas dárigeri Anna Tsepke málim etti, dep habarlaıdy QazAqparat tilshisi.
«Týberkýlez aýrýynan aıyǵý, ony ýaqytynda anyqtap, emdelýimen baılanysty. Sondyqtan da bizdiń aktsııanyń maqsaty – halyqty habardar etý. Jyl saıyn elordada týberkýlez aýrýyna shaldyqqan 500 adam anyqtalady. Bıylǵy «Stop týberkýlez!» aılyǵy aıasynda 9 adam anyqtalyp, búginde olar tıisti em alyp jatyr. Olardyń áleýmettik sanaty ártúrli. Al, jalpy, qala boıynsha 900 adam týberkýlezden aıyǵý jolynda em alýda. Syrqattan kóz jumý deńgeıine kelsek, 2017 jyly – 18 adam, 2018 jyldyń toǵyz aıynda – 22 adam, al bıylǵy toǵyz aıda 8 adam qaıtys boldy. Degenmen, elordada týberkýlez aýrýyna shaldyǵý kórsetkishi sońǵy 5 jylda 1,5 esege tómendegenin baıqaımyz», - dedi Anna Tsepke qalalyq ákimdikte ótken baspasóz máslıhatynda.
Onyń aıtýynsha, atalmysh dertke shaldyqqandarǵa áleýmettik kómek kórsetiledi.
«Týberkýlezdi qajetti qarjy respýblıkalyq bıýdjetten bólinedi. Odan bólek, árıne jergilikti bıýdjetten de qarjylandyrylady. Atap aıtqanda, ákimdikten áleýmettik qoldaý kórsetiledi. Osy jylǵa deıin emdelýshilerge azyq-túlik jáne qoǵamdyq kólik bıleti túrinde qoldaý kórsetilse. Bıylǵy jyldyń 1 tamyzynan bastap 10 AEK kóleminde tólemaqy beriledi», - dedi ol.
Ftızıopýlmonologııalyq ortalyq bergen derekke súıensek, Nur-Sultan qalasynda týberkýlez aýrýymen 2017 jyly – 540 adam, 2018 jyldyń toǵyz aıynda – 375 jáne bıylǵy jyldyń toǵyz aıynda 369 adam tirkeldi.
Aıta ketsek, 23 qyrkúıek pen 23 qazan aıy aralyǵynda elordada «Stop týberkýlez!» aktsııasy ótti. Onyń aıasynda 14 myń astanalyq turǵyn qamtylyp, aqparattyq túsindirme jumystary júrgizildi.
