Bıyl elordada órt saldarynan 11 adam kóz jumdy
NUR-SULTAN. QazAqparat - Bıyl elorda aýmaǵy boıynsha 214 órt faktory tirkelip, saldarynan 11 adam kóz jumdy. Bul týraly Nur-Sultan qalasy TJD basqarma bastyǵynyń mindetin atqarýshy Erkin Otarǵalymuly aıtty, dep habarlaıdy QazAqparat tilshisi.
«Bıyl qala aýmaǵy boıynsha 214 órt faktory tirkeldi. Saldarynan 11 adam kóz jumyp, 11 adam jaraqat aldy. Órtten 69 adam qutqarylyp, 205 adam qaýipsiz jerge evakýatsııalandy. Qazirgi tańda dala jáne orman órti, balalardyń terezeden qulaý faktileri alańdaýshylyq týǵyzýda», - dedi Erkin Otarǵalymuly.
Onyń aıtýynsha, elordanyń jasyl beldeýiniń jalpy 14,8 myń ga bolsa, onyń 11,5 ga kólemine aǵash ekpeleri otyrǵyzylǵan.
«Atalǵan orman qoryn órtten aldyn alý maqsatynda qala aýmaǵynda qala ákimdigi bekitken josparǵa sáıkes aldyn alý jumystary júzege asyrylýda. Sonymen qatar, alty baǵyt boıynsha mobıldik toptar qurylǵan. Olardyń maqsaty - órttiń aldyń alý, ýaqytyly anyqtaý jáne der kezinde den qoıý. Qala perımetri boıynsha ornalasqan 10 munara bar. Ol jerde ormanshylar táýlik boıy kúzet jasaıdy. Sondaı-aq, múmkin bolatyn órttiń aldyn alý maqsatynda qala aýmaǵynda 32 beınekamera ornalastyrylǵan. Dala ormany órtin alý maqsatynda mıneraldandyrylǵan jolaqtar salyndy. Ol tasjol jıeginde paıda bolǵan órttiń aǵash egilgen jerge ótip ketpeýine septigin tıgizedi», - deıdi ol.
