Bıyl elordada mektep bitirýshi túlekterdiń 96 paıyzy UBT tapsyrady
NUR-SULTAN. QazAqparat – Elimiz boıynsha Ulttyq biryńǵaı testileý (UBT) synaǵy 2020 jyldyń 20 maýsymy men 5 shilde aralyǵynda ótedi, dep habarlaıdy QazAqparat tilshisi.
«Bıylǵy jyly elimiz boıynsha mektep bitirýshilerden UBT tapsyrýǵa 131 683 ótinish kelip tústi. Nur-Sultan qalasy boıynsha aıtar bolsaq, bıylǵy 6515 mektep bitirýshi túlektiń 96% atalǵan test synaǵyn tapsyrýǵa nıet bildirip otyr», - dedi Nur-Sultan qalasynyń bilim salasyndaǵy sapany qamtamasyz etý departamentiniń basshysy Baǵymgúl Kóptileýova ákimdikte ótken baspasóz máslıhatynda.
Sondaı-aq, departament basshysy túlekterge attestat tapsyrý sharasyna qatysty arnaıy erejeni tanystyryp ótti.
«Aldaǵy 3-4 maýsym kúnderi elimiz boıynsha mektep bitirýshi túlekterge attestat tapsyrý jıynyn ótkizý josparlanýda. Bul shara mekteptiń árbir synyby úshin jeke túrde sanıtarlyq erejelerdi saqtaı otyryp, ıaǵnı ashyq alańdarda uıymdastyrylýy qajet. Mınıstrliktiń buıryǵymen bekitilgen tujyrymdamaǵa sáıkes, mektep túlekteri mindetti túrde maska kııýi tıis jáne ár oqýshynyń arasy 2 metr qashyqtyqta bolýy shart. Sharanyń uzaqtyǵy 20 mınýttan aspaýy kerek jáne oǵan ózge adamdardyń qatysýyna tyıym salynady», - dedi ol.
Aıta ketsek, búgin elorda ákimdiginde «Pedagog mártebesi týraly» zań talaptaryn júzege asyrý jáne Nur-Sultan qalasynyń bilim salasynda sapany qamtamasyz etý departamentiniń pandemııa kezindegi atqarǵan jumystaryna arnalǵan baspasóz máslıhaty ótti.
