Bıyl elordada qansha sharshy metr baspana paıdalanýǵa beriledi
NUR-SULTAN. QazAqparat - Bıyl elordada 3 mln sharshy metr turǵyn úı paıdalanýǵa beriledi. Bul týraly Nur-Sultan qalasynyń ákimi Altaı Kólginov aıtty, dep habarlaıdy QazAqparat tilshisi.
«Bıyl biz 3 mln sharshy metr turǵyn úıdi paıdalanýǵa berýdi josparlap otyrmyz. Aldymyzǵa óte baıypty mindet júktelip otyr. Salystyrý úshin aıtar bolsaq, ótken jyly 1 mln 700 sharshy metr baspanany paıdalanýǵa bergen edik. Soǵan oraı kún saıyn qurylysshylarmen kezdesip, máselelerdi talqylap otyramyz. Bul rette sizder, máslıhat depýtattary bizge úlken qoldaý kórsetip otyrsyzdar. Sizder saılaýshylardyń úlken leginiń atynan ókildik etesizder», - dedi Altaı Kólginov Nur-Sultan qalalyq máslıhatynyń otyrysynda.
Otyrys barysynda elorda ákimi qalada shuǵyl sheshýdi qajet etetin 3 problemany ataǵan bolatyn.
Onyń qatarynda Úshinshi jylý elektr stansasyn aıaqtaý, úshinshi sorǵy-súzgi stansasyn jáne kárizdik tazartý qurylǵysyn salý bar.
«Elordanyń qarqyndy damýyna, halyq, kólik sanynyń ósimine qatysty ózge de problemalardy aıtpaǵanda osy úsh másele júıeli sıpatqa ıe bolyp otyr. Árıne, munyń barlyq kólik, ınjenerlik, áleýmettik ınfraqurylymǵa júkteme túsiredi», - dedi Altaı Kólginov.
