Bıyl elordada qandaı kósheler jóndeýden ótedi
Qalalyq kólik jáne jol-kólik ınfraqurylymyn damytý basqarmasy osy jyly jalpy uzyndyǵy 8,42 shaqyrym bolatyn jeti kósheni jáne Kóktal-1, Agroqalashyq, Óndiris, Ońtústik-Shyǵys (oń jaǵalaý) turǵyn úı aýdandarynda jalpy uzyndyǵy 31shaqyrym bolatyn 87 kóshege ortasha jóndeý jumystaryn júrgizýdi josparlap otyr. Bul týraly basqarmanyń baspasóz qyzmeti habarlady.
Atap aıtqanda, jóndeý jumystary: Syǵanaq pen Kereı-Jánibek handar kósheleriniń aralyǵynda jatqan Bókeıhan kóshesinde; Moldaǵulova men Esenberlın kósheleriniń aralyǵyndaǵy Zataevıch kóshesinde; Saryarqa jáne Respýblıka dańǵyldarynyń aralyǵynda jatqan Abaı dańǵylynda; Sh. K. Kýmı men Sh. Beısekova kósheleriniń aralyǵynda jatqan Qosshyǵululy kóshesinde; Táýelsizdik jáne M. Jumabaev dańǵyldarynyń aralyǵynda jatqan Kúıshi Dına kóshesinde; Alash tas jolynda(jergilikti joldar men avtobýs joldary qurylysy); Táýelsizdik jáne M. Jumabaev dańǵyldarynyń aralyǵynda jatqan B. Maılın kóshesinde júrgiziledi.
Kóshe asfalt-beton jamylǵylarynda aqaýlardyń paıda bolýyna negizinen kúrt kontınentaldy klımat (temperatýranyń kúrt tómendeýi), kólik quraldarynyń joǵary qarqyndylyǵy, sondaı-aq kúrdeli jóndeý merziminiń aıaqtalýy sebep bolǵan.
«Asfaltbetondy beton jamylǵylaryndaǵy kemshilikter, tesikter men shuńqyrlar, jaryqtar kóbinese jóndeý jumystary aıaqtalǵan kóshelerde (kúrdeli jóndeý merzimi - 5 jyl) paıda bolady. Mysaly, Abaı dańǵylynyń Saryarqa dańǵylynan Respýblıka dańǵylyna deıingi aralyǵy. Bul bólimde sońǵy ret jóndeý jumystary 2012 jyly júrgizilgen, ıaǵnı 7 jyl buryn jáne búgingi tańda tósenish, pıllıng jáne qaptamada jaryqtar kórinýde, kemshilikter bar. Saryarqa dańǵyly men Sh. Ýálıhanov kóshesiniń arasynda jatqan Bógenbaı batyr dańǵylynyń bóligi. Sońǵy ret osy ýchaskeni jóndeý 2010 jyly, ıaǵnı 9 jyl buryn júzege asyryldy», - dep túsindirdi kólik jáne jol-kólik ınfraqurylymyn damytý basqarmasynda.
Basqarma qalanyń jol jelisindegi kem-ketik, jaryqtar monıtorıngin kúndelikti ótkizip, qadaǵalap otyrady. Turǵyndardyń hattary, ótinishteri jáne «109» qyzmeti, áleýmettik jelilerden alynǵan aqparat boıynsha, sondaı-aq monıtorıng aqparaty, aýdandyq ákimdikter suraýlarynyń negizinde basqarma tıisti merzimde aǵymdaǵy jóndeý josparyn jasaıdy. Jumystar kestege saı júrgiziledi.
Qalada jol jóndeý ýaqyty jobamen sáýir aıynyń ortasynan bastalady. Normatıvtik qujattamaǵa sáıkes, ystyq asfalt beton qospasyn aýa temperatýrasy + 10 ° S-ten tómen bolmaǵan jaǵdaıda tóseý kerek. Ákimshilik quqyq buzýshylyq týraly kodekstiń «Tynyshtyqty buzý» 437-babyna sáıkes túnde jumys isteýge jol berilmeıdi.
