Bıyl elordada esirtki paıdalanyp kólik júrgizgen 39 júrgizýshi ustaldy
ASTANA. 2 naýryz. QazAqparat - Bıyl elordada avtokólikterdi esirtki paıdalanyp alyp júrgizgen 39 adam anyqtaldy. Bul týraly búgin Astananyń ІІD Esirtki bıznesine qarsy kúres basqarmasynyń bólim bastyǵy Sergeı Ilınyh aıtty.
«2012 jyldyń basynan beri Astana qalasynyń aýmaǵynda avtokólikterdi esirtkini paıdalana otyryp júrgizý boıynsha 39 fakti anyqtaldy. Qazirgi kezde 29 adam ákimshilik sot arqyly kólikti júrgizý quqynan aıyryldy», - dedi bólim bastyǵy.
«Ótken jyly qaladaǵy qoǵamdyq kóliktiń úsh júrgizýshisi kólikti mas kúıinde júrgizgeni úshin ustalǵan bolatyn. Jalpy, esirtki paıdalanyp, avtobýsqa otyrǵan júrgizýshiler tirkelmegen», - dedi S. Ilınyh.
Taratylǵan málimetterge qaraǵanda, qala aýmaǵynda esirtkige qatysty 2011 jyldyń basynan beri 221 qylmystyq is qozǵalyp, onyń 110-y esirtki satýmen aınalysatyn azamattarǵa qatysty boldy. Zańsyz aınalymnan 242 keli 820 gramm esirtki zattary, onyń ishinde 6 keli 430 gramm geroın tárkilendi.
Aıta keteıik, 2012 jyldyń basynan beri «Rýbej» beketinde esirtki tasymalynyń 21 faktisi anyqtalyp, 2 adam qylmystyq, 19 adam ákimshilik jaýapqa tartyldy. «Rýbej» júıesiniń beketterinde zańsyz aınalymnan 3 keli 702 gramm túrli esirtki zattary (onyń ishinde 30,32 gramy geroın) tárkilendi.
Avtokólik júrgizýshileriniń esirtki zattaryn paıdalanýynyń aldyn alý maqsatynda Esirtki bıznesimen kúres basqarmasy men jol polıtsııasy qyzmetkerleri birlesip reıdtik sharalar júrgizýde.
