Bıyl elordada áleýmettik osal otbasylarǵa 1 900 páter beriledi- Baqyt Sultanov
NUR-SULTAN. QazAqparat - Búgin Nur-Sultan qalasynyń ákimi Baqyt Sultanov jáne QR Eńbek jáne halyqty áleýmettik qorǵaý mınıstri Berdibek Saparbaev elordanyń az qamtylǵan jáne kópbalaly otbasylarymen kezdesti, dep habarlaıdy QazAqparat tilshisi.
«Az qamtylǵan jáne kóp balaly otbasylardy tolǵandyratyn basty máselelerdiń biri - turǵyn úı. Búginde bas qalada 45 myń adam turǵyn úı kezeginde tur, onyń 20 myńy az qamtylǵan, kópbalaly jáne múgedek múshesi bar otbasylar. Jáne 22 myńy memlekettik jáne bıýdjet qyzmetkerleri. Qazirgi ýaqytta osy tizimdegilerdiń 188-ine páter berildi, jalpy jospar boıynsha bıyl 781 páter berilýi tıis, biraq budan bólek jyl sońyna deıin áleýmettik jaǵynan osal topqa jatatyn otbasylarǵa qosymsha qarjylandyrý esebinen taǵy 1 800-1 900 páter beriledi», - dedi Baqyt Sultanov.
Qala basshysynyń aıtýynsha, atalǵan maqsatqa bıýdjetten 1,3 trln teńge qajet.
«Turǵyn úıden bólek búginde bıýdjetten 8 mlrd teńge qarjy bólinip, ol 13 túrli áleýmettik sharalarǵa jumsalýda. Mysaly, múgedekter men olardyń asyraýshylarynyń qoǵamdyq kólikterde tegin júrýi engizilýde, odan bólek kópbalaly jáne az qamtylǵan otbasylardan shyqqan 1-11 synyp oqýshylary osy jyldyń 1 qyrkúıeginen bastap mektepte tegin ystyq tamaqpen qamtylady. Bizde buǵan deıin tek qana bastaýysh synyp oqýshylary tegin tamaqpen qamtamasyz etilgen. Sol sııaqty atalǵan sanatqa jatatyn otbasynyń balalaryna jazǵy ýaqytta demalys uıymdastyrylady. Atap aıtqanda, osy jazda elordanyń 10 myń búldirshinine jazǵy demalys oryndaryna joldama beriledi, bul maqsatta 500 mln teńge qarjy bólý qarastyrylýda», - dedi ol.
Sondaı-aq, B.Sultanov az qamtylǵan jáne kóp balaly otbasydan shyqqan oqýshylardy mektep formasymen qamtamasyz etý maqsatynda bıýdjetten 638 mln teńge jáne osy sanatqa jatatyn otbasydan shyqqan búldirshinderdi balabaqshamen qamtý maqsatynda 513 mln teńge qarjy bólinetinin aıtyp ótti.
