Bıyl elordada Air Astana áýe kompanııasynyń alǵashqy ushaqjaıy paıdalanýǵa beriledi
ALMATY. QazAqparat - Bıyl Elordada Air Astana áýe kompanııasynyń alǵashqy ushaqjaıy paıdalanýǵa beriledi. Bul týraly búgin Almatyda ótken baspasóz máslıhatynda málim etildi.
«Biz ushaqjaıdy bıyl paıdalanýǵa berýdi josparlap otyrmyz. Ol áýe kompanııasynyń óz qarjysyna salynyp jatyr. Qazirgi tańda basqa qandaı da bir áýe kompanııasymen áriptestik ornatý jaǵy qarastyrylyp jatqan joq. Biraq, bolashaqta ushaqjaıdy paıdalaný boıynsha qosalqy bólshekterdi jetkizýshilermen jáne qozǵaltqysh óndirýshilermen kelissóz júrgizilýi ábden múmkin», - dedi óz sózinde Air Astana áýe kompanııasynyń aǵa ushqyshy Igor Segedın.
Sondaı-aq, kezdesý barysynda ol jýrnalısterge áýege taralatyn zııandy zattardy azaıtý boıynsha tıisti sharalar qoldanylyp jatqandyǵyn jetkizdi.
«Air Astana-nyń zııandy zattardy azaıtý boıynsha qoldanyp jatqan sharalary birneshe kezeńnen turady. Birinshi - bul áýe flotyn jańartý. Ol zııandy zattardyń áýege taralýyn azaıtýǵa tikeleı áser etedi. Ushaqtar da mashına sııaqty ǵoı, eskirgen saıyn qozǵaltqyshlary áýege zııandy zattardy soǵurlym kóp taratady. Sońǵy 2-3 jyl ishinde kompanııa óziniń Airbus 320 ushaqtar parkin tolyǵymen jańartty. Ushaqtardyń ushý jıiligi 31 paıyzǵa artqanymen, biz ushaqtardy jańaratýdyń arqasynda zııandy zattardyń aýaǵa taralýyn jylyna 10 tonnaǵa deıin azaıtýǵa qol jetkizdik. Búgingi tańda kompanııanyń áýe parkinde 30 ushaq bar. Olar: Boeing Airbus jáne Embraer ushaqtary. Biz taǵy da birneshe Airbus ushaǵyn satyp alýdy josparlap otyrmyz. Olarǵa ornatylǵan jańa qozǵaltqyshtar janarmaıdy 15 paıyzǵa únemdeýge múmkindik beredi. Kerosın az jaǵylǵan saıyn, zııandy zattar da az taraıdy. Taǵy bir baǵyt - ol, qaldyqtardy azaıtý. Bizde ydystardyń barlyǵy plastmassadan jasalǵan. Qazir kompanııada qaıta óńdelmeıtin qaldyqtardy azaıtý boıynsha arnaıy baǵdarlama júzege asyrylyp jatyr. Osyǵan baılanysty, bizde árbir 3-6 aı saıyn taǵamdardyń, qoqysqa arnalǵan qapshyqtardyń jáne basqa da zattardyń quramy tekserilip turady», - dedi ol.
Sonymen qatar, kezdesý barysynda ushý qaýipsizdigin sertıfıkattaý máselesi de kóterildi.
«Taıaýda Air Astana áýe kompanııasy avıatsııalyq qaýipsizdik boıynsha Eýropalyq komıtettiń «qara tiziminen» shyqty.
2015 jyldyń sońynda kompanııa aýdıtorlyq tekserýden oıdaǵydaı ótti. Biz sondaı-aq, ótken jyly IOSA aýdıtorlyq tekserýinen de oıdaǵydaı óttik. Endi mundaı tekserýler tek 2017 jyly júrgiziledi», - dedi I. Segedın.
