Bıyl elordada 8 myń adam áleýmettik turǵyn úımen qamtylady
Shilde aıynda kezekte turǵan 1 200 qala turǵyny baspana kiltin alady. Olar: turmysy tómen azamattar, erekshe kútimdi qajet etetin balalary bar otbasylar, jetim balalar, zeınetkerler, kópbalaly otbasylar jáne turǵyn úı qurylys jınaq bankinde kezekte turǵandar.
«Bıyl Memleket basshysynyń tapsyrmasy boıynsha, qoljetimdi áleýmettik turǵyn úı kólemi úsh ese artady. Kezekte turǵan segiz myń páter beriledi. Áleýmettik jaǵynan osal toptaǵy, az qamtylǵan qala turǵyndary, jetim balalar, erekshe kútimdi qajet etetin balalary bar otbasylar, zeınetkerler, kópbalaly jáne t.b. jandar páterge ıe bola alady. Karantın kezinde qurylysshylarmen onlaın-keńester ótkizemiz, jumys ýaqyty qadaǵalanady, árqaısysymen jeke jumys isteımiz. Biz óz tarapymyzdan qoldaý kórsetemiz. Turǵyn úı kezegin barynsha jedeldetýge tyrysamyz. Sonymen qatar bıyl koronavırýspen kúreste aldyńǵy shepte júrgen medıtsına qyzmetkerleri, muǵalimder, áleýmettik qyzmetkerler, polıtsııa qyzmetkerleri páter alady. Sondaı-aq bıyl aldaǵy jylǵa daıyndyq júrgizilýde», – dedi qala ákimi Altaı Kólginov.
Bıyl uzaqqa sozylǵan qurylys sebebinen jyldar boıy kútýge májbúr bolǵan 8 myń úlesker baspana alady.
