Bıyl elordada 6 mektep paıdalanýǵa beriledi - qala basshysy

ASTANA. QazAqparat - Bıyl elordada 6 mektep paıdalanýǵa beriledi. Bul týraly búgin Elbasy Nursultan Nazarbaevtyń tóraǵalyǵymen ótip jatqan elordany odan ary damytý máseleleri jónindegi májiliste Astana qalasynyń ákimi Áset Isekeshev aıtty, dep habarlaıdy QazAqparat.

«Balalardy mektepke deıingi bilimmen qamtý 70,6-dan 80 paıyzǵa deıin artty. Qalada 94 memlekettik jáne 181 jeke balabaqsha jumys isteıdi. Jyldyń sońyna deıin balalardyń 90 paıyzyn negizinen jekemenshik balabaqshalarǵa memlekettik tapsyrys bólý esebinen qamtımyz», - dedi qala basshysy.

Onyń aıtýynsha, elordada mektepke baratyn balalardyń sany 143 myńnan asady. Oqýshylar sany sońǵy 7 jylda 2 esege jýyq artqan.

«Sizdiń tapsyrmańyz boıynsha Úkimetpen birlesip, taıaý úsh jylda 27 mektep pen 10 japsarlas ǵımarat qurylysy boıynsha jospar túzdik. 10 mekteptiń qurylysy júrgizilip jatyr. Onyń 6-aýy aǵymdaǵy jyly paıdalanýǵa beriledi», - dedi Áset Isekeshev.

Onyń sózine qaraǵanda, QR Prezıdentiniń tapsyrmasyna sáıkes qurylys normalaryna ózgerister engizilgen. Endigi ýaqytta elordada mektepter 3 myńǵa deıin oqýshyny qamtýǵa shaqtalyp salynady. Mektepterdiń jer telimi 3 gektardan 2 gektarǵa deıin qysqartyldy.

«Astana jan basyna qarjylandyrýdy engizý boıynsha ilki qala sanalady. Bul jeke ınvestıtsııa esebinen mektep salýǵa múmkindik beredi. Qazirgi ýaqytta BAÁ men Sıngapýr ınvestorlarynyń esebinen 5 myń oqýshyǵa arnalǵan 3 halyqaralyq mektepti qosa alǵanda birneshe mekteptiń jobasy daıyndalýda»,- dedi ol.