Bıyl elordada 5G ınternet iske qosylady
Bul týraly Májilistegi «Nur Otan» partııasy parlamenttik fraktsııasynyń keńeıtilgen otyrysynda Úkimet basshysy Asqar Mamın aıtty, dep habarlaıdy QazAqparat tilshisi.
«Shaǵyn jáne monoqalardy qosa alǵanda, qalalarda ómirdiń jaıly jáne qaýipsiz jaǵdaıyn qamtamasyz etý jumysy jalǵasady. 2023 jylǵa qaraı úleskerlik qurylystaǵy barlyq problemaly turǵyn úılerdiń qurylysy aıaqtalady. 2025 jylǵa qaraı barlyq respýblıkalyq joldar jańǵyrtylyp, jóndeledi jáne jol boıyndaǵy servıspen qamtamasyz etiledi», - dedi Úkimet basshysy «Nur Otan» partııasynyń «Ózgerister joly: ár azamatqa laıyqty ómir!» Saılaý baǵdarlamasyn oryndaýdyń Jol kartasyn talqylaý barysynda.
Premer-Mınıstrdiń aıtýynsha, bıyl 2,2 myń shaqyrym avtomobıl joly jańǵyrtylyp, respýblıkalyq joldardyń 66 paıyzy jol boıyndaǵy servıspen qamtamasyz etiledi.
«2025 jyly barlyq oblys ortalyǵy men respýblıkalyq mańyzy bar qalalar joǵary jyldamdyqty 5G ınternetpen qamtylatyn bolady. Bıyl Nur-Sultan qalasynda, 2022 jyly Almaty qalasynda pılottyq iske qosý júzege asyrylyp, odan keıin respýblıkalyq mańyzy bar qalalarda jáne barlyq oblys ortalyqtarynda óndiristik paıdalanýǵa engiziledi», - dedi ol.
Úkimet basshysy Nur-Sultan, Qaraǵandy, Jezqazǵan jáne Temirtaý qalalarynyń 350 myńnan astam turǵyny kógildir otynǵa qol jetkizetindigin aıtty.
«2021 jyly 68 myń adam gazǵa qol jetkizip, odan keıin jyl saıyn keńeıtý esebinen maqsatty kórsetkishke jetkiziledi», - dedi Asqar Mamın.
