Bıyl elordada 55 myńnan astam jumys orny ashylady

ASTANA. QazAqparat – Bıyl elordada 24 myńnan astam adamdy jumyspen qamtý josparlanyp otyr, onyń 16,5 myńnan astamy – jastar. Bul týraly Astana qalasy jumyspen qamtý jáne áleýmettik qorǵaý basqarmasy basshysynyń orynbasary Erlan Júsipov málim etti, dep habarlaıdy QazAqparat tilshisi.

«Byltyr 40 513 jańa jumys orny quryldy, onyń ishinde 35 981 myńy –turaqty jumys. Ulttyq jobalardy iske asyrý aıasynda ótken jyly Astana qalasynda 14 211 jańa jumys orny quryldy. Atap ótý kerek, ótken jyldan bastap elordada «Jastar praktıkasy», «Alǵashqy jumys orny» jáne «Urpaqtar kelisimsharty» jobalaryna qatysýshylardyń jalaqysy 30 AEK-ten (aılyq eseptik kórsetkish) artty. Sonymen qatar, jastar men halyqtyń áleýmettik osal toptary úshin jańa bıznes-ıdeıalardy iske asyrýǵa arnalǵan grant mólsheri 400 AEK-ke deıin (1,2 mln teńge) ulǵaıtyldy», - dedi Erlan Júsipov Astana qalasy kommýnıkatsııalar qyzmeti alańynda ótken brıfıngide.

Onyń aıtýynsha, búginde «Elektrondy eńbek bırjasy» ınternet portalynda 1 674 jumys berýshiden 4 306 bos oryn ornalastyrylǵan.

«Bıyl 24 myńnan astam adamdy jumyspen qamtý josparlanyp otyr, onyń ishinde 16,5 myńnan astamy – jastar. Sondaı-aq, qalada 55 myńnan astam jańa jumys ornyn qurý jospary bar. Onyń ishinde Ulttyq jobalar aıasynda 10,3 myń jumys orny qurylmaq», - deıdi ol.

Buǵan deıin elorda jastaryna 2,5 paıyzben 5 mln teńgege deıin shaǵyn nesıe beriletini týraly habarlaǵan edik.