Bıyl elordada 40 myń bala bilim alatyn 15 mektep salynady
NUR-SULTAN. QazAqparat – Bıyl elordada 40 myń bala bilim alatyn 15 mektep salynady. Bul týraly qala turǵyndarymen esep berý kezdesýinde elorda ákimi Altaı Kólginov aıtty, dep habarlaıdy QazAqparat tilshisi.
Onyń atap ótýinshe, Nur-Sultan ákimdigi mektep qurylysy boıynsha jumystardy júıeli júrgizýde. 2021 jyly 2020 jylǵa qaraǵanda eki ese, 2019 jylmen salystyrǵanda tórt ese kóp oryn ashylady.
«Bilim sapasy men oǵan jaǵdaı jasaýǵa mán berý óte mańyzdy. Turǵyndar sanynyń artýyna baılanysty mektepterdegi oqýshylarǵa oryn jetispeýshiligin qysqartý úshin jyl saıyn keminde 10 mektep salý kerek. 2020 jyly 2019 jylǵa qaraǵanda paıdalanýǵa berilgen mekteper sany eki esege kóp. Bul 11 bilim mekemesi buryn mektep bolmaǵan turǵyn alaptarda salyndy. Ol jerlerde buryn balalar beıimdelgen ǵımarattarda oqyǵan. Jańa mektepter úsh aýysymdy mektepter sanyn 8-den 4-ke qysqartýǵa múmkindik berdi. Budan bólek, birqatar mektep qazandyq jylytýdan ortalyqtandyrylǵan jylytýǵa kóshirildi. Bul - mektepterge tek jylytý boıynsha jyl saıyn 100 mln teńge únemdeýge múmkindik beredi. 2021 jyly 15 mektep salatyn bolamyz. Bul 40 myń oryn ashýǵa múmkindik beredi», - dedi Altaı Kólginov.
Elorda ákimdiginiń málimetinshe, 5 jyldyq keshendi jospar aıasynda 50 mekteptiń qurylysyn júrgizýge josparlanyp otyr. Mektep qurylysyna jeke ınvestorlar da tartylatyn bolady.
