Bıyl elordada 16 mektep salynady

NUR-SULTAN. QazAqparat – Qazaqstannyń Tuńǵysh Prezıdenti Nur-Sultan qalasynyń ákimi Altaı Kólginovti qabyldady. Bul týraly QazAqparat elbasy.kz saıtyna silteme jasap habarlaıdy.

Kezdesýde Elbasyǵa elordanyń ekonomıkalyq damýy, qalany gazdandyrý úderisi, turǵyn úı men áleýmettik-mádenı nysandar qurylysy, sondaı-aq qoǵamdyq jerlerdi abattandyrý týraly aqparat berildi.

«Qoljetimdi baspana salý kólemi jyl sanap artyp keledi. Bıyl 10 myńǵa jýyq páter tapsyrý josparlanyp otyr. Sonymen qatar 42 myń oqýshyǵa arnalǵan 16 mektep salynady», – dedi A.Kólginov.

Sonymen birge qala ákimi Nursultan Nazarbaevqa elordanyń «jasyl beldeýin» damytý jospary, qala aýmaǵy men saıabaqtardy kógaldandyrý boıynsha iske asyrylyp jatqan sharalar týraly baıandady.

Anyqtama úshin:

2012-2020 jyldary «jasyl beldeýde» 8127 gektar jerge 3 174 342 dana aǵash kósheti otyrǵyzyldy. Onyń 59,3 paıyzy japyraqty, 40,7 paıyzy qylqan japyraqty aǵash. 636,6 gektarǵa kópjyldyq shóp egildi. 2021 jyly «jasyl beldeýge» 900 myńǵa tarta kóshet otyrǵyzý josparlanǵan. Qala ishinde 100 myńǵa jýyq aǵash, kóshet, buta egiledi.