Bıyl elordada 150 myń turǵyn gazǵa qosyldy

NUR-SULTAN. QazAqparat – Jyl basynan beri 150 myń elorda turǵyny tabıǵı gazǵa qol jetkizdi. Sondaı-aq, jylý energetıkasy tapshylyǵyn joıý maqsatynda altynshy jylý magıstrali salynady. Bul týraly Nur-Sultan qalasynyń ákimi Altaı Kólginov málim etti, dep habarlaıdy QazAqparat tilshisi.

«Elordada energetıka salasy qyzmetiniń sapasyn arttyrý maqsatynda birqatar sharalar qabyldanýda. Birinshiden, 7,5 shaqyrym jylý jelisi salyndy jáne qaıta jóndeýden ótti. Bul qalanyń energııa jelilerine degen senimdilikti arttyrýǵa múmkindik beredi. Sonymen qatar 17 shaqyrym elektr berý nysany salynyp, qaıta jóndeldi. Bul elektr jelilerindegi tehnologııalyq apat sanyn azaıtýǵa jáne qalanyń jańa aýdandaryn elektrmen qamtýǵa múmkindik berdi. Qalada 4 mlrd teńgeden astam somany quraıtyn 1 myńǵa jýyq ıesiz qalǵan nysan anyqtalyp, olar kommýnaldyq menshikke berildi. Bıyl JEO-1, JEO-2 –niń 13 sý jylytý qazandyqtary gazǵa aýystyryldy. Al JEO-3 boıynsha jobaǵa túzetý engizilip, qurylys montajdaý jumysy qaıta jandandy», - dedi A. Kólginov Úkimet otyrysynda baıandama jasaı otyryp.

Onyń aıtýynsha, JEO-3-ti iske qosý 6 mln sharshy metrdi quraıtyn turǵyn úı men basqa da nysandardy jylýmen qamtýǵa múmkindik beredi.

«Jylý energetıka tapshylyǵyn boldyrmaý maqsatynda saǵatyna 1,700 Kvt energııa beretin 3 gaz qazandyǵyn salý boıynsha jobalyq-smetalyq qujat ázirlenýde. Elordada besinshi jylý magıstraliniń qurylysy aıaqtalyp, altynshy jylý magıstraliniń qurylysyn bastaý jumysy júrip jatyr. Olar qalanyń jańadan salynyp jatqan aýdandaryn jylýmen qamtamasyz etpek», - deıdi ol.

Sondaı-aq, elorda ákimi qalany gazben qamtý jumysynyń barysyna toqtalyp ótti.

«Jeke sektordy gazdandyrý jumysy jalǵasýda. Osyǵan deıin 670 shaqyrym gaz jelisi salynsa, bıyldyń óinde 317 shaqyrym gaz jelisi tartyldy. Qala irgesinde ornalasqan 10 turǵyn úı alabyna tabıǵı gaz jetkizilip, 2 myńnan astam abonent kógildir otynǵa qosyldy. Bul baǵyttaǵy jumysyn jalǵasyn tabady. Eger ótken jyly 43 myń turǵyn gazǵa qol jetkizse, bıyl taǵy 150 myń turǵynnyń gazǵa qosylý múmkindigine ıe boldy. Tehnıkalyq sharttar kún saıyn berilýde. Búginde elordada 21 áleýmettik nysandy gazǵa qosý jumysy júrip jatyr. Bul oraıda QazTransGaz Aımaq kompanııasymen jumysyn jalǵasýda. Gazdandyrý jobasyn ońtaılandyrý nátıjesinde 2 mlrd 2 mln teńge qarjy únemdeldi jáne ol qarajat respýblıkalyq bıýdjetke keri qaıtarylady», - dedi qala basshysy.