Bıyl elordada 10 jańa turǵyn úı kesheni qoldanysqa beriledi
Bul týraly elorda boıynsha qurylys basqarmasynyń basshysy Ərsen Jańǵasqanov qalalyq máslıhattyń kezekti otyrysynda aıtty.
«Turǵyn úı qurylysyn damytýǵa 3 jylda 114 mlrd teńge bólingen bolatyn. Onyń 14,2 mlrd teńgesi 2018 jyly, 26,3 mlrd teńgesi 2019 jyly, 74 mlrd teńgesi 2020 jyly bólindi. Baspana salý «Nurly jer» memlekettik baǵdarlamasynyń aıasynda bıýdjet qarajaty esebinen iske asyp jatyr. Esepti merzimde qala boıynsha 3 881 páterdi qamtyǵan 16 kópqabatty turǵyn úı kesheni qoldanysqa berildi. Onyń ishinde 8-i 1399 páterdi qamtyǵan arendalyq turǵyn úı kesheni paıdalanýǵa berildi. Kópbalaly otbasylar men jas otbasylar úshin 2565 arendalyq baspana satyp alyndy. 2018 jyly 635 páterli 4 turǵyn úı kesheni, 2019 jyly 1484 páterli 6 túrǵyn úı kesheni, 2020 jyly 1862 páterli 6 turǵyn úı kesheni paıdalanýǵa berildi», - deıdi ákimdik ókili.
Basqarma basshysy bıylǵy jyldyń josparyna da toqtaldy.
«2021 jyly 43,5 mlrld teńge ıgerý josparlanǵan. Bıyl basqarma 7793 páterdi satyp alyp, qoldanysqa berýdi josparlap otyr. Olardyń jalpy aýdany 392 myń sharshy metr bolmaq. 10 kópqabatty turǵyn úı keshenin qoldanysqa berýdiń esebinen 4035 páterdi qoldanysqa berý josparlanǵan. Al jyljymaıtyn múlik naryǵynan 1580 arendalyq páter satyp alý josparda bar. 2020 jyly problemalyq nysandardaǵy qurylysty aıaqtaý úshin bólingen kredıtterdi qaıtarý jolynda «Nurly jer» baǵdarlamasy arqyly kezekte turǵandarǵa 1858 páter kredıtke beriledi», - dedi Ərsen Jańǵasqanov.
