Bıyl elorda mańyna 330 myńǵa jýyq qylqan japyraqty kóshet otyrǵyzylady
NUR-SULTAN.QazAqparat – Bıyl elorda mańyna 330 myńǵa jýyq japyraqty, qylqan japyraqty kóshet otyrǵyzylady. Bul týraly elorda ákimi Altaı Kólginov óziniń Facebook paraqshasynda jazdy, dep habarlaıdy QazAqparat.
Ákimniń jazýynsha, elordanyń jasyl beldeýi – qalanyń tynys alý organy ispettes. Orman ósirý Elbasynyń bastamasy negizinde sheshilgen bolatyn. Osy ýaqyt aralyǵynda jasyl beldeý aıtarlyqtaı keńeıdi. Jyl saıyn myńdaǵan tal-terek otyrǵyzylady. Jasyl beldeý qalanyń ekologııasy men klımattyq jaǵdaıyn jaqsartýǵa septigin tıgizip keledi.
«Bıyl 330 myńǵa jýyq japyraqty, qylqan japyraqty kóshet jáne qosymsha taǵy 3 myńnan astam kóshet otyrǵyzamyz. Jalpy, aýmaqta 10,2 mıllıonnan astam tal men 1,8 mıllıon qaraqat, yrǵaı, deren, t.b. ósip keledi.
Kóktemde jasyl beldeýdiń soqpaq jol jelisin qaıta qurýǵa kiristik. Aýmaqta belsendi ýaqyt ótkizýge arnalǵan skeıtbordıng alańy, rolıkpen syrǵanaıtyn shaǵyn alańdardy (qysta konkı tebýge de bolady) salý jumystary júrgizilip jatyr. Jaıaý serýendeýge jáne kross-kantrı sabaqtaryna arnalǵan joldar salynady. Sondaı-aq, balalarǵa arnalǵan oıyn alańdaryn, fýtbol jáne tennıs alańdaryn jasaımyz»-deıdi ákim.
Onyń jazýynsha, jasyl beldeýdi búginde qoıan, qarsaq, túlki, qyrǵaýyl jáne t.b. janýarlar men qustar mekendeıdi. Jasyl beldeýdegi qustardyń sanyn arttyrý boıynsha da jumystar júrgizilip jatyr.
«Elordanyń barlyq aýdandarynda kógaldandyrýǵa nazar aýdaryp kelemiz. Bıyl 30 myń túp aǵash otyrǵyzamyz. Aýlalardy, saıabaqtardy, tynymbaqtar men býlvarlardy abattandyrý kezinde kóshetter otyrǵyzamyz. Árıne olarǵa kútim jasaý mańyzdy. Otyrǵyzylǵan tal-terekter men gúlderdi kútip-baptaý úshin kóktemnen bastap sýarý júıesin 20%-ten 90%-ke deıin qalpyna keltirdik.
Prezıdent halyqqa Joldaýynda ekologııalyq týrızm mádenıetin belsendi damytý mańyzdy mindet ekenin atap ótti. Ol úshin elordada qala turǵyndary men qonaqtaryna arnalǵan ekoparkter qurý boıynsha jumystar júrgizilip keledi»,-dedi Altaı Kólginov.
