Bıyl elorda qalaı ózgeredi - Altaı Kólginov aıtyp berdi
NUR-SULTAN. QazAqparat - Elordany kóriktendirý jumystarynyń barlyǵy «Nur-Sultan – jaıly qala» master-plany tujyrymdamasy aıasynda júrgizilip keledi. ıAǵnı, osy sala boıynsha naqty damý kartasy bar. Atalǵan baǵytta atqarylyp jatqan jumys jaıly qala ákimi Altaı Kólginov «Egemen Qazaqstan» basylymyna bergen suhbatynda málim etti.
Bıyl astanada demalys oryndary men jasyl jelekti aımaqtar aıtarlyqtaı kóbeıedi. Ekologııany jaqsartyp, turǵyndardyń demalysta ýaqyt ótkizýine qolaıly oryndar jasaý úshin qalany kógaldandyrý jalǵasa beredi. Aýlalar men qoǵamdyq keńistikterde (saıabaqtar, skverler, býlvarlar) tal-terek egý ary qaraı da júrgiziledi.
«B.Momyshuly dańǵyly boıymen jaǵalaýǵa deıin jaıaý júrginshiler jelekjolyn abattandyramyz. «Tolqyn tárizdi alleıa» aýmaǵynda ústel tennısi men shahmatqa arnalǵan ústelder, demalýǵa jáne átkenshek tebýge arnalǵan kóleńkeli aımaqtar ornatýdy josparlap otyrmyz. Bul «Trıatlon parkin» jańa bórtegúl baǵymen biriktire otyryp, eko-marshrýt qurýǵa múmkindik beredi. Onda myńnan astam bórtegúl kóshetin otyrǵyzamyz», - dedi ákim.
Ol óz sózinde byltyr Trıatlon saıabaǵyn aýqymdy abattandyrý bastalǵanyn atap ótti. Budan bólek, ótken jyly qalada alǵash ret kópirasty alańdar jasaldy. Saraıshyq kóshesindegi «Arqar» kópiriniń astynda sportpen aınalysýǵa arnalǵan birneshe aımaq ashylyp, saıabaq aýmaǵynda fýtbol alańdary ornatyldy. Bul – Trıatlon men Prezıdent saıabaqtary arasyndaǵy kópir, ol bıyl da jalǵasady.
Sol sııaqty Tuńǵysh Prezıdent saıabaǵynda kóleńkeli bastyrmalar, átkenshekter, úsh sýburqaq, onyń ishinde tumandy býlaný, oryndyqtar jáne taǵy basqasy ornatyldy. Aldaǵy ýaqytta ózen arqyly velo-jaıaý júrginshi kópirin salý josparlanyp otyr. Bul kópir eki saıabaqty – Tuńǵysh Prezıdent saıabaǵy men Esil ózeniniń boıyndaǵy saıabaqty biryńǵaı klastermen biriktirýge múmkindik beredi. Osylaısha qala turǵyndary aýdandar arasynda kedergisiz júre alady. Kópirdiń boıynda demalys aımaqtary jabdyqtalady, al kópirdiń ishine (astyna) átkenshek ornatylady.
Ázirbaıjan Mambetov kóshesi boıynda, qalanyń oń jaǵalaýynda jańa qoǵamdyq keńistik - «Demalys Promenad» jasaldy. Munda Arbat ispetti jaıaý júrginshige arnalǵan keńistik boldy.
«Memleket basshysynyń tapsyrmasy boıynsha qoǵamdyq keńistikterdi (saıabaqtar, skverler, býlvarlar, baqtar) abattandyrý kezinde, kógaldandyrýǵa erekshe nazar aýdaramyz, óıtkeni bul – qala damýynyń ajyramas bóligi.
Bıylǵy kógaldandyrý jumystarynyń ereksheligi aýlalyq aýmaqtardan, saıabaqtardan, skverlerden, býlvarlardan, eldi mekenderden basqa, kórikti jerlerimizdiń irgeles aýmaqtaryn kógaldandyrýǵa kiriskenimizde. Bul «betondy oryndar» sanyn azaıtady. Mysaly Q.Qýanyshbaev atyndaǵy Qazaq mýzykalyq-drama teatry men «Astana Balet» aýmaǵynda jasyl baq, al «Astana Opera» aýmaǵynda emen baǵy, Trıatlon saıabaǵynda bórtegúl baǵy ashylady. Qazir barlyq jerde kóshetter otyrǵyzylyp jatyr. Ózim de qalany kógaldandyrýǵa qatysamyn. Qalanyń barlyq aýdanyn, sonyń ishinde eldi mekenderdi kógaldandyramyz», - deıdi elorda ákimi.
Jalpy, aǵash egýge qala turǵyndary, eriktiler, kásipkerler de qatysatyny qýantady. Osy jyly 1 mıllıonnan astam jasyl jelek (aǵashtar, butalar, kóshetter jáne t.b.) otyrǵyzýdy josparlap otyrmyz. Qazir qalanyń jasyl túske aınalǵanyn, jańa ekoaımaqtar men «jasyl araldar» paıda bolǵanyn kórýge bolady. Eger jyldan-jylǵa sapaly tal egip, kóshet otyrǵyzý josparyn osy deńgeıde ustap tursaq, elorda sanaýly jyldar ishinde jasyl qalaǵa aınalmaq. Bir kezderi dalaly jerden turǵan qala baqshaly shahar bolady. 2020 jyly 148 aýla men 60 qoǵamdyq keńistik turǵyndarǵa jańadan paıdalanýǵa berildi. Osy jyly 150 aýla men 28 qoǵamdyq keńistikti abattandyramyz.
«Elbasy suqbatynda elordanyń bas jospary ǵımarattardyń, jasyl jelekter men ormannyń sımbıozy retinde jasalǵanyn atap ótti. Bul baǵyttaǵy jumystar jalǵastyrylady. Qala turǵyndarynyń qatysýymen senbilikter, ekoaktsııalar turaqty ótkiziledi. Shahardy kógaldandyrýǵa kez kelgen adam úles qosa alady», - dedi Altaı Kólginov.
