Bıyl elorda balabaqshalaryna 24 myń bala qabyldanady
ASTANA. QazAqparat - Aǵymdaǵy jyldyń sáýir-mamyr aılarynda elorda balabaqshalary 24 myń bala qabyldaıtyn bolady. Bul týraly búgin Astana qalalyq bilim basqarmasynyń basshysy Ánýar Janǵozın málim etti, dep habarlaıdy QazAqparat.
«Aǵymdaǵy jyly balalardy mektepke deıingi uıymmen 90 paıyzǵa deıin qamtýdy kózdep otyrmyz. Al 2020 jyly bul kórsetkish 100 paıyzǵa jetedi. Qazirgi ýaqytta kezekte 26 myń bala tur», - dep atap ótti ol búgin Astana ákimdiginde uıymdastyrylǵan baspasóz máslıhaty barysynda.
Jalpy búginde elordada 336 mektepke deıingi mekeme jumys isteıdi. Onyń ishinde 98 memlekettik balabaqsha, 188 jekemenshik balabaqsha, 47 shaǵyn ortalyq pen 3 vedomstvolyq balabaqsha bar. Jekemenshik balabaqshalardyń 181-i memlekettik tapsyrys alady. Balabaqshaǵa baratyn balalardyń jalpy sany - 56 myń. Balalardy mektepke deıingi bilimmen qamtamasyz etý kórsetkishi 80 paıyzdy quraıdy.
«Balalardyń negizgi bóligi osy jyldyń sáýir-mamyr aılarynda mektepke deıingi uıymdy bitirip shyǵatyn bolady. Sol kezde 24 myń bala balabaqshaǵa qabyldanady», - dedi Ánýar Janǵozın.
Onyń aıtýynsha, aǵymdaǵy jyly elordada 2 memlekettik balabaqsha salynady. Degenmen, bul da balabaqshadaǵy oryn tapshylyǵyn joıa almaıdy. Sondyqtan balalardy mektepke deıingi uıymmen qamtý úshin jekemenshik balabaqshalardy damytý qajet.
