Bıyl elorda aýmaǵyna 1 mln túp jasyl jelek egiledi
«Bıyl ákimdik álemniń damyǵan «jasyl qalalarynyń» úlgisi boıynsha 5 jyl ishinde Astanany «Baq qalaǵa» aınaldyrý boıynsha úlken jumys bastady. Aldaǵy 5 jylǵa arnalǵan núktelik strategııany odan ári bekite otyryp, Astana aýmaǵyn kógaldandyrý jónindegi tujyrymdama (budan ári – tujyrymdama) ázirlendi. Ol «2030 jylǵa deıin qalanyń qoǵamdyq keńistigin damytý jáne kógaldandyrý shemasy» jobasymen (jyl saıyn naqty kógaldandyrylǵan kóshelerdi, saıabaqtardy, skverlerdi, otyrǵyzý merzimderin, jasyl ekpelerdiń túrlik quramyn jáne t.b. kórsete otyryp) tolyqtyrylatyn bolady. Tujyrymdama adamnyń ýrbanızatsııalanǵan ortada qoljetimdi jáne jaıly bolýyna baǵyttalǵan qalalyq ortany ońtaılandyrýdyń zamanaýı tásilderi men ádisterin eskeretin qalany kógaldandyrý júıesin strategııalyq qala qurylysyn damytýdyń negizgi qaǵıdattary men baǵyttary ázirlengen turaqty jáne tıimdi kógaldandyrý júıesin qurý úshin jaǵdaılardy qamtamasyz etýge baǵyttalǵan», - dep atap ótedi ákimdik agenttiktiń resmı saýalyna bergen jaýabynda.
Osy jyly qalany kógaldandyrýǵa qarjylandyrý 2 esege ulǵaıtylǵan.
«Sondaı-aq, bıyl shamamen 1 mln jasyl jelek, onyń ishinde qala aýmaǵynda 452 myńnan astam jáne «jasyl beldeý» aýmaǵynda 457 myńnan astam ekpe otyrǵyzylady. Egý ýchaskeleri men olardyń túrlik quramy aıqyndaldy. Kóktemgi otyrǵyzý, onyń ishinde «Jasyl Astana» kóktemgi ekologııalyq aılyǵy aıasynda bıznes sýbektilerin, eriktilerdi, ekologııalyq, jastar jáne stýdentter uıymdaryn tarta otyryp, 292 525 dana jasyl jelek («Jasyl beldeý» aýmaǵynda - 249 514 dana, qala ishinde - 43 011 dana) egiledi. Kógaldandyrý jumystary kúzgi otyrǵyzý jáne «Jasyl Astana» kúzgi ekologııalyq aılyǵy kezeńinde jalǵasatyn bolady», - dedi ákimdikten.
