Bıyl elimizge Túrkııa, AQSh, Ulybrıtanııa jáne Germanııadan týrıster kóp kelgen

ASTANA. QazAqparat – Túrkııa, AQSh, Ulybrıtanııa jáne Germanııa azamattary qańtar aıynyń basynan bastap Qazaqstanǵa kelgen TOP-10 memleket týrısteri qataryna endi, dep habarlaıdy QazAqparat Mádenıet jáne sport mınıstrliginiń baspasóz qyzmetine silteme jasap.

Jyl basynan beri elimizge 2,5 myńǵa jýyq Túrkııa azamaty, 1,4 myńǵa jýyq Germanııa, 1,4 myńǵa jýyq AQSh jáne 1,2 myńǵa jýyq Ulybrıtanııa azamaty keldi.

Al, taıaý shetelden kelgender boıynsha alǵashqy ondyqta: Reseı – 58,2 myńnan astam týrıst, Ózbekstan – 11,2 myńnan astam, Qyrǵyzstan – 3 myńǵa jýyq, QHR – 2,3 myńnan astam, Tájikstan – 2,3 myńnan astam saıahatshy.

Úndistannan kelgen qonaqtardyń dınamıkasy baıqalady: shamamen 3 myń adam. Aıta ketsek, jaqynda Úndistanda Qazaqstan bedeldi týrıstik syılyq alǵan bolatyn.

Týrıster kóp baratyn eń tartymdy jer retinde Almaty kósh bastap tur – 40 myńǵa jýyq týrıst. Odan keıin Astana (22 myńnan astam), Aqtóbe oblysy (4 733), Atyraý oblysy (4 212), Mańǵystaý oblysy (3 023), Batys Qazaqstan oblysy (2 778), Pavlodar oblysy (2 719), Soltústik Qazaqstan oblysy (2 651), Shymkent (2 586) jáne Qaraǵandy oblysy (2 573)

«Týrısterdiń negizgi bóligi Almaty jáne Astana qonaq úılerine toqtaıdy. Eń kóp suranysqa ıe úzdik ondyqqa kirgen kórikti mekende osy eki megapolıstiń qonaq úıleri bar. Bul rette jyl basynan beri qonaqtardy Qazaqstan boıynsha 16 654 jeke jáne 6 746 zańdy tulǵa qabyldaǵan», - dedi Mádenıet jáne sport vıtse-mınıstri Erjan Erkinbaev.