Bıyl elimizdiń joldary boıynda 14 medıtsınalyq-qutqarý pýnkti ashylady
ASTANA. QazAqparat - Ótken jyly respýblıkalyq mańyzy bar avtomobıl joldarynyń asa avarııalyq ýchaskelerinde 14 jol boıy medıtsınalyq-qutqarý pýnkti salyndy.
Qazirgi tańda respýblıka boıynsha tas joldarda 26 medıtsınalyq-qutqarý pýnkti bar. Atalmysh pýnktterdiń brıgadalary 2013 jyly jáne 2014 jyldyń birinshi toqsanynda 903 ret shyǵyp, zardap shekken 2 680 adamǵa kómek kórsetti, 776 adam aýrýhanaǵa jatqyzyldy. Aǵymdaǵy jyly taǵy 14 jol pýnkti salynady, dep habarlady QR TJM baspasóz qyzmetinen.
Sondaı-aq «Salamatty Qazaqstan» memlekettik baǵdarlamasy aıasynda TJM sanıtarlyq avıatsııasyn damytý maqsatynda 14 «ES-145» tikushaǵy men 2 «Ka-32» tikushaǵy satyp alyndy. Bul respýblıkadaǵy barlyq oblys ortalyqtaryn sanıtarlyq avıatsııalyq tikushaqtarymen qamtamasyz etýge múmkindik berdi.
Tikushaqtar elimizdiń ár oblys ortalyǵynda táýlik boıy kezekshilikte turady. Osy jyldyń І toqsanynda olar 141 ret ushyp, 127 syrqatty tasymaldaǵan. 26 adam dáriger keńesine júginse, 12 shuǵyl ota jasalǵan, dep habarlaıdy strategy2050.
