Bıyl elimizdiń quqyqtyq bazasy qoǵamdyq ómirdiń san túrli salalaryn retteıtin 130 zańmen tolyqtyryldy-QR Parlamenti Májilisiniń Tóraǵasy O. Muhamedjanov
Májilis Tóraǵasy óz sózinde: «Qazaqstannyń jańa onjyldyqtaǵy strategııalyq damý jospary, sonymen birge 2014 jylǵa deıingi údemeli ındýstrııalyq-ınnovatsııalyq damý baǵdarlamasy bekitildi. Elimizdiń Eýropadaǵy qaýipsizdik pen yntymaqtastyq uıymyna tabysty tóraǵalyq etýi, ásirese, Uıymǵa múshe elder Sammıtiniń 11 jyldan keıin Astanada ótkizilýi Qazaqstannyń halyqaralyq dárejedegi abyroı-bedelin asqaqtatyp qana qoımaı, elimizdiń ishki birligi men azamattarymyzdyń patrıottyq sezimin odan ári bekemdeı túsken oqıǵa boldy», - dedi.
Odan ári Palata jetekshisi Elbasy Nursultan Ábishuly Nazarbaevtyń 2010 jylǵy Qazaqstan halqyna Joldaýynda jáne tórtinshi saılanǵan Parlamenttiń tórtinshi sessııasyn ashý kezinde sóılegen sózinde bizdiń bıylǵy jylǵy zań shyǵarý qyzmetimizdiń basty baǵyttaryn aıqyndap bergenin aıtty.
O. Muhamedjanovtyń aıtýynsha, 2010 jyly depýtattar korpýsynyń Úkimetpen ıin tirese qoıan-qoltyq jumys isteýiniń arqasynda elimizdiń quqyqtyq bazasy qoǵamdyq ómirdiń san túrli salalaryn retteıtin 130 zańmen tolyqtyryldy. «Biz eldi odan ári demokratııalandyrýdyń quqyqtyq bazasyn jasap, Qazaqstannyń qazirgi damý satysy úshin strategııalyq mańyzdy bolyp tabylatyn birqatar ekonomıkalyq zańdardy qabyldadyq. Olar memlekettiń daǵdarysqa qarsy sharalaryn ári qaraı iske asyrýǵa, ekonomıkany ártaraptandyrýǵa jáne onyń ósimin yntalandyrýǵa, sondaı-aq áleýmettik mindettemelerdiń oryndalýyn qamtamasyz etýge baǵyttaldy. Prezıdent qol qoıǵan «2011-2013 jyldarǵa arnalǵan respýblıkalyq bıýdjet týraly» Zańda azamattardyń turmys sapasyn arttyrý men jumyssyzdyqqa jol bermeý, shaǵyn jáne orta bızneske qoldaý kórsetý, agroónerkásiptik keshendi damytý baǵdarlamalaryn qarjylandyrý kólemin eleýli túrde kóbeıtý máseleleri kózdeldi»,- dedi O.Muhamedjanov.
Palata Tóraǵasynyń atap kórsetkenindeı, Elbasynyń halyqty áleýmettik qamsyzdandyrý jóninde bergen tapsyrmalaryn iske asyrý maqsatynda zeınetaqymen qamsyzdandyrý jónindegi zańǵa da tıisti ózgerister engizildi. 2010 jyly bıýdjet salasy qyzmetkerleriniń jalaqysy men stýdentter shákirtaqysy jáne zeınetaqy mólsheri 25 paıyzǵa kóbeıtilgen bolsa, kelesi jyly olar tıisinshe 30 paıyzǵa kóbeıtiletin bolady. Jahandyq qarjy daǵdarysy jaǵdaıynda álemniń kóptegen elderi áleýmettik tólemder mólsherin qysqartyp jatqan kezde, bizdiń elimizde olardyń kóbeıtilip otyrǵany daǵdarysqa qarsy sharalar der kezinde uıymdastyrylyp, júzege asyrylýynyń arqasynda bolyp otyr.
Parlament «Ǵylym týraly», «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qorynyń» mártebesi týraly» zań jobalaryn qabyldady. Atalǵan zańdardyń aldyńǵysy ǵylym salasyn basqarýdyń jańa úlgisin ornyqtyratyn bolsa, keıingileri otandyq ǵylym jáne bilim salasynda Elbasynyń tikeleı bastamasymen iske asyrylyp jatqan serpindi jobaǵa baılanysty bolyp tabylady.
Qabyldanǵan zańdardyń bir parasy quqyq qorǵaý salasyndaǵy reformaǵa qatysty boldy. Qazaqstan Respýblıkasy Prezıdentiniń «Qazaqstan Respýblıkasynda quqyq qorǵaý qyzmeti men sot júıesiniń tıimdiligin arttyrý jónindegi sharalar týraly» 2010 jylǵy 17 tamyzdaǵy Jarlyǵyn iske asyrý maqsatynda Parlament 16 zań jobasyn qabyldap, Elbasynyń qol qoıýyna jiberdi. Bul zańdarda negizinen qoǵamdyq qaýipsizdikti qamtamasyz etý, sonymen qatar qylmystyq jazany izgilendirý máseleleri qamtyldy.
Bıylǵy jyly elimizdiń halyqaralyq baılanystaryn retteıtin 78 qujat ratıfıkatsııalandy.
«Osy qysqasha sholýdyń ózi bizdiń Palatamyzdyń, jalpy Parlamenttiń 2010 jyly aýqymdy jumys atqarǵanyn kórsetedi. Bul nátıje bizdiń depýtattarymyzdyń jumys toptary men komıtetterde belsendi jumys istep, qajetti zańdardy der kezinde qabyldaýǵa atsalysýy arqasynda bolyp otyr. Parlamentimizdiń, onyń ishinde Májilistiń zań shyǵarý qyzmetine laıyqty úles qosyp kele jatqan áriptesterimizge óz rızashylyǵymdy bildirgim keledi. Barshańyzdy aldaǵy Jańa jyl merekesimen shyn júrekten quttyqtaımyn. Kelesi jyl da búkil elimiz, barsha halqymyz úshin qut-bereke jyly bolsyn! Qyzmetimizge - jańa tabys, otbasylarymyzǵa mol baqyt darytsyn!»,- dep sózin qorytty Májilis Tóraǵasy Oral Muhamedjanov.
