Bıyl elimizdiń qaı óńirlerinde jaýyn-shashyn az bolady

NUR-SULTAN. QazAqparat – Bıyl elimizdiń úsh óńirinde jaýyn-shashyn az túsedi. Sondaı-aq, eki oblysta qurǵaqshylyq bolýy múmkin. Bul týraly QR Prezıdenti Teleradıokeshininiń «Úsh suraq» baǵdarlamasynda suhbat bergen «Qazgıdromet» RMK Bas dırektory Danara Álimbaeva málim etti, dep habarlaıdy QazAqparat tilshisi.

«Buǵan deıin Qyzylorda oblysynyń Qarmaqshy aýdanynda jáne Maǵystaý oblysynyń Qaraqııa aýdanynda bıyl qurǵaqshylyq bolatynyn málimdegen edik. Budan bólek, bıyl jaýyn-shashyn jetispeýshiligi bolýy múmkin óńirlerdi anyqtadyq. Bizdiń boljam boıynsha, Aqtóbeniń Áıteke bı jáne Hromtaý aýdandarynda jaýyn az jaýady. Al, Qyzylorda oblysynyń basym bóliginde jańbyr jaýý kórsetkishteri óte tómen. Qaraǵandy oblysynyń Qarqaraly men Nura aýdandarynda da jaýyn-shashyn defıtsıti bolýy múmkin», - dep boljam nátıjelerin baıandady Danara Álimbaeva.

Buǵan qosa, «Qazgıdromet» basshysy egin sharýashylyǵymen aınalysatyn óńirlerde bıyl aýa-raıy qolaıly bolatynyn aıtty.

«Aldyn ala derekter boıynsha, Soltústik Qazaqstan, Qostanaı jáne Pavlodar oblystarynda egin shyǵymy jyldyq normaǵa sáıkes bolady dep kútilip otyr. Al, Túrkistan men Jambyl oblystaryndaǵy kúzdik daqyldar shyǵymy belgilengen kólemnen kóp bolýy múmkin. Óıtkeni, bul óńirlerde jaýyn kóp jaýady», - dedi «Qazgıdromet» RMK Bas dırektory.

Eske sala keteıik, buǵan deıin «Qazgıdromet» jahandyq jylyný deńgeıi álem boıynsha Qazaqstanda óte joǵary ekenin málimdep edi.