Bıyl elimizdiń 8 óńirinde balalardy ońaltý ortalyqtary ashylady
NUR-SULTAN. QazAqparat – Bıyl elimizdiń 8 óńirinde balalardy ońaltý ortalyqtary ashylady. Bul jaıynda Májilis depýtattarynyń saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.
«Qazirgi ýaqytta mınıstrlik (Bilim jáne ǵylym mınıstrligi) mektepke deıingi, orta bilim berý uıymdaryn, sonymen qatar arnaýly bilim berý uıymdaryn qural-jabdyqtarmen jáne jıhazben jabdyqtaý normasyna ózgertýler men tolyqtyrýlar engizý jumysyn júrgizip jatyr. «Qamqorlyq» QR Tuńǵysh Prezıdenti – Elbasy qory bastamasyn júzege asyrý jónindegi jol kartasy aıasynda medıtsınalyq qyzmetterdiń qoljetimdiligin arttyrý úshin 2020 jyly 8 óńirde medıtsınalyq uıymdardyń bazasynda jańa medıtsınalyq jabdyqtarmen jabdyqtalǵan balalardy ońaltý ortalyqtary ashyldy», - dedi ol.
Onyń atap ótýinshe, bıyl elimizdiń taǵy 8 óńirinde, atap aıtqanda Aqmola, Aqtóbe, Almaty, Shyǵys Qazaqstan, Jambyl, Qyzylorda, Mańǵystaý, Túrkistan oblystarynda dál osyndaı balalardy ońaltý ortalyǵyn jáne Shyǵys Qazaqstan men Qostanaı oblystarynlda 2 erte aralasý ortalyǵyn ashý josparlanǵan.
«2020-2025 jyldarǵa arnalǵan Qazaqstan Respýblıkasyndaǵy densaýlyq saqtaýdy damytýdyń memlekettik baǵdarlamasyn júzege asyrý aıasynda 10 óńirde (Aqtóbe, Almaty, Atyraý, Shyǵys Qazaqstan, Batys Qazaqstan, Qostanaı, Mańǵystaý, Soltústik Qazaqstan, Túrkistan oblystarynda jáne Nur-Sultan qalasynda) balalardy ońaltý ortalyqtaryn ashý kózdelgen», - dedi Asqar Mamın.
