Bıyl elimizden qajylyqqa baratyn jamaǵattyń alǵashqy toby saýapty saparǵa attanyp ketti
ASTANA. 29 qyrkúıek. QazAqparat - Bıyl elimizden qajylyq saparyna 4400 adam attanady. Bas múftı Erjan qajy Malǵajyuly Almaty qalasy Ortalyq meshitinde otandastarymyzdyń alǵashqy tobyn (100 adam) saýapty saparǵa duǵa-tilekpen shyǵaryp saldy.
Bul týraly Qazaqstan musylmandary dinı basqarmasynyń baspasóz qyzmeti habarlady.
Qajylyq ǵıbadatyn óteý - Allanyń uly nyǵmeti. Bas múftı Erjan qajy Malǵajyuly osyndaı saýaby teńdessiz uly saparǵa barýymyz áýeli Jaratýshy Iemizdiń, sodan keıin táýelsizdigimizdiń arqasynda júzege asyp jatqanyna toqtaldy.
«Qajylyq - saýapty sapar, qıyndyǵy mol, árbir qajydan úlken sabyrlylyq, tereń tózimdilikti, rııasyz taqýalyqty talap eter ǵıbadattyń túri. Qajylyq sapary saýda-sattyq nemese týrıstik sapar emes, ózindik ereksheligi bar ǵıbadat joly, sondyqtan da árbir musylmannan tıisti daıyndyqty, ony oryndaýdyń ózindik erekshelikteri jaıly maǵlumatty bilýdi talap etetin qulshylyqtyń túri. Paıǵambarymyz (s.ǵ.s.): «Kimde kim Alla taǵala rızashylyǵy úshin qajylyq jasasa, jaman sózden, jaman qylyqtardan, kúnálardan saqtansa anasynan týylǵandaı pák bolyp qaıtady», - degen. Qajylyqtyń ár mınýtyn qulshylyqpen, duǵa-tilekpen ótkizýdiń saýaby mol. Osy saparda elimizge amandyq, jerimizge tynyshtyq, dinimizdiń janashyry Elbasyna, din qamynda júrgen azamattarǵa esendik, denderine saýlyq tilesek abzal bolady. Alla taǵala saparlaryńyzdy ońdy etip, elimizge aman-saý oralýlaryńyzdy tileımin», - dedi Erjan qajy Malǵajyuly.
Bıyl Qazaqstan musylmandary dinı basqarmasy janynan qurylǵan mıssııa músheleri - dárigerler medıtsınalyq kómek kórsetse, 30 ımam qajylarǵa ýaǵyz-nasıhat aıtyp, baǵyt-baǵdar beretin bolady. QMDB Mıssııa jumysyna Bas múftıdiń birinshi orynbasary Serikbaı qajy Oraz tóraǵalyq etpek.
Búginde Almaty qalasyndaǵy Mádına meshitinde ashylǵan Qajylardy oqytý ortalyǵynda otandastarymyz arnaıy dáristen ótýde. Qajylyq saparynda jıi kezdesetin suraqtarǵa Dinı basqarma mamandary jaýap berýde.
1993 jyldyń jazynda Qazaqstannan tuńǵysh ret 300 adam qajylyq saparyna attandy. Sol jyldan bastap qajylyqqa nıet bildirgen jerlesterimizdiń sany artyp keledi. 2013 jyly olardyń sany 4400-ge jetti.
