Bıyl elimizdegi úsh zaýyt 17 mln tonna munaı óńdeıdi

PAVLODAR. QazAqparat – Júrgizilip jatqan kúzgi dala jumystaryna baılanysty tamyzdan bastap dızel otynyna suranys artqan. Keıbir óńirlerdegi dızel tapshylyǵyna qatysty dúrbeleńge qaramastan, elimizdegi úsh munaı óńdeý zaýyty úzdiksiz jumys istep tur. Dızel óndirisi tómendegen joq, otyn jetkilikti.

Bul týraly Pavlodardaǵy munaı-hımııa zaýytyna jumys saparymen barǵan «QazMunaıGaz» ulttyq kompanııasynyń Basqarma tóraǵasy Maǵzum Myrzaǵalıev málim etti, dep habarlaıdy QazAqparat tilshisi.

Kezdesýde «QazMunaıGaz» jáne Pavlodar munaı-hımııa zaýytynyń basshylyǵy, janarmaı quıý beketteri saýda jelileriniń ókilderi ishki naryqty dızel otynymen qamtamasyz etý máselelerin talqylady.

«QazMunaıGaz» UK Basqarma tóraǵasy Maǵzum Myrzaǵalıev munaı óńdeý kólemi sońǵy jyldary turaqty túrde artyp kele jatqanyna toqtaldy.

«Aǵymdaǵy jyly elimizdegi úsh zaýyt 17 mln tonna munaı óńdeıtin bolady. ıAǵnı, bıyl 2021 jylmen salystyrǵanda 1 mln tonnaǵa artyq munaı óńdeý josparlanǵan. Sondyqtan zaýyttardyń tolyq qýatta jumys istep turýyn qamtamasyz etý mańyzdy», - dep atap ótti Maǵzum Myrzaǵalıev.

Al janarmaı quıý salasynda qyzmet kórsetetin kásipkerler ishki naryqta dızelge suranys asa joǵary ekenin jetkizdi. Elde bul otyn túrin paıdalaný kórsetkishiniń ósýine - Reseı, Ózbekstan jáne Qyrǵyzstanmen shekaralas óńirlerdegi joǵary suranys sebep bolyp otyr. Kásipkerler dereginshe, bul aımaqtarda kórshiles elderdiń tranzıttik júk kólikteri otyndy úlken kólemde quıyp áketip jatyr. Odan bólek, olar janar-jaǵarmaıdy zańsyz shekara asyrýy da múmkin.

Sonymen qatar janarmaı quıý beketteriniń ókilderi Qazaqstandaǵy dızel otynynyń bólshek saýda quny Reseıdegi baǵadan 1,5 ese arzan ekenin atap ótti. Máselen, 2022 jyly tamyzda reseılik janarmaı beketinde dızel baǵasy lıtrine - 429 teńge bolsa, Qazaqstanda lıtri - 238 teńgeden satyldy.

Munymen qosa, Ortalyq Azııa elderinen Qazaqstan men Reseıge aýyl sharýashylyǵy ónimderi, kókónis pen jemis-jıdektiń tasymaly qazirgi ishki naryqtaǵy janar-jaǵarmaı máselesin kúrdelendirip tur.

«QazMunaıGaz» UK Basqarma tóraǵasynyń orynbasary Arman Qaırdenovtiń dereginshe, Qazaqstanda dızel otynyn tutyný bıyl 800 myń tonnaǵa ósedi. Máselen, 2020 jylǵy kórsetkish 4,7 mln tonna bolsa, 2022 jyldyń qorytyndysy boıynsha 5,5 mln tonna dızel otyna suranys bolady dep kútilýde.

Jıyn qorytyndysy boıynsha Maǵzum Myrzaǵalıev kúzgi dala jumystary kezinde ishki naryqty dızel otynymen turaqty qamtamasyz etýdi tapsyrdy. Soymen qatar munaı ónimderiniń jetispeýshiligin boldyrmaý maqsatynda Shymkent munaı óńdeý zaýytyndaǵy bıylǵy jóndeý jumystary keler jylǵa shegerildi.