Bıyl elimizdegi birneshe áýejaıdaǵy qurylys jumystary aıaqtalady
NUR-SULTAN. QazAqparat - Qazaqstanda áýe kóligi ınfraqurylymyn jańǵyrtý jumystary josparly túrde júrgizilip jatyr. Bul týraly QR Indýstrııa jáne ınfraqurylymdyq damý mnıstrliginen málim boldy, dep habarlaıdy QazAqparat.
«Infraqurylymdy damytýdyń 2020-2025 jyldarǵa arnalǵan «Nurly jol» memlekettik baǵdarlamasy aıasynda Óskemen qalasy áýejaıynyń ushý-qoný jolaǵy qaıta jańartylýda. Jobada jolaqtardy 300 metrge uzartý jáne áýe kemeleriniń qazirgi zamanǵy úlgilerin qabyldaý úshin jaryq-dybys jabdyqtaryn aýystyrý kózdelgen. Jeke ınvestıtsııalar esebinen Shymkent qalasy áýejaıynyń jańa termınaly salynyp jatyr. Nátıjesinde, termınal alańy 3,8 myńnan 35 myń sharshy metrge deıin keńeıip, ótkizý qabileti saǵatyna 150-den 2000 jolaýshyǵa deıin artady. Jańa termınal halyqaralyq sapa jáne qaýipsizdik standarttaryna sáıkes keledi. Bul megapolıs turǵyndary men qonaqtary úshin qolaıly jaǵdaı jasaıdy», - delingen vedomstvo málimetinde.
Batys Qazaqstan oblysynyń ákimdigi jeke ınvestıtsııalardy tarta otyryp, Oral qalasy áýejaıynyń aerovokzal keshenin jańǵyrtyp jatyr. Termınal aýmaǵy eki eseden astam ulǵaıtylyp, ótkizý qabileti saǵatyna 100-den 200 jolaýshyǵa deıin jetkiziledi.
Atalǵan jobalar boıynsha qurylys jumystaryn 2021 jyldyń sońynda jáne kelesi jyldyń birinshi jartyjyldyǵyna aıaqtaý josparlanǵan.
Alakól týrıstik ortalyǵyna kólikpen baryp-qaıtýdy qolaıly etý maqsatynda Úrjardyń ushý-qoný jolaǵyn jáne aerovokzal ǵımaratyn rekonstrýktsııalaý jumystaryn bıyl aıaqtaý josparlanýda. Sondaı-aq, Úsharal qalasy áýejaıynyń ushý-qoný jolaǵyn, róldeý jolyn jáne perronyn rekonstrýktsııalaý jumystary bastaldy.
Osy jobalardy iske asyrý áýejaılardyń jerústi ınfraqurylymyn jaqsartyp, qaýipsizdik jáne qyzmet kórsetý standarttaryn arttyrýǵa yqpal etedi.
