Bıyl elimizdegi avtojoldardyń 2600 shaqyrymynda qozǵalys jandanady
«Qazaqstanda 2020 jyly avtojoldardyń 2600 shaqyrymynda qozǵalys jandanady dep josparlanyp otyr. Mundaı mindetti mınıstrliktiń aldyna Úkimet basshysy qoıǵan bolatyn. Búginde joldardy salý jáne qaıta jańartý jumystary elimizdiń ár óńirinde qarqyn alǵan. QR Indýstrııa jáne ınfraqurylymdyq damý mınıstri Beıbit Atamqulov 3 oblys aýmaǵynda joldardaǵy jumys barysymen tanysyp qaıtty. Birinshi kezekte mınıstr «Taldyqorǵan – Qalbataý – Óskemen» avtomobıl jolynyń Shyǵys Qazaqstan jáne Almaty oblystaryndaǵy ýchaskelerine bardy. Jol Alakól kýrorttyq aımaǵy mańynda bolǵandyqtan, elimizdiń týrıstik klasterin damytýda úlken mańyzǵa ıe. Bıyl avtojolda tolyqtaı qozǵalys jandanady dep josparlanyp otyr. Jol 1-shi jáne 2-shi tehnıkalyq sanattarǵa sáıkestendirilmek», - delingen QR IIDM málimetinde.
Óńirge keletin týrıster sanyn arttyrýǵa septigin tıgizetin taǵy da bir joba – Qytaı shekarasyna deıin aparatyn «Úsharal – Dostyq» tasjolyn qaıta jańartý jobasy. Jumystar aıaqtalǵan soń týrıster sany ǵana emes, avtokólikterimen júk tasymalynyń kólemi artady. Bıyl joldyń 60 shaqyrymynda kólikter júre bastaıdy dep josparlanǵan.
Sondaı-aq, oblys úshin úlken múmkindikterge jol ashatyn jobalardyń biri – «Qalbataý – Maıqapshaǵaı» jolyn qaıta jańartý jobasy. Bıyl tasjoldyń 415 shaqyrymy kólikter úshin ashylady. Úshinshi tehnıkalyq sanattaǵy jol eki jolaǵy bar ekinshi sanattaǵy jolǵa aınalady.
Budan bólek, mınıstr qaıta jańartý jumystary júrip jatqan Jambyl jáne Almaty oblystaryndaǵy «Uzynaǵash – Otar» jolynyń ýchaskelerine baryp qaıtty. Jyl sońyna deıin joldyń 56 shaqyrymynda qozǵalys qaıta qalpyna keledi degen jospar bar. Sondaı-aq, vedomstvo basshysy «Qordaı» ótkizý beketin qaıta jańartý jumystary barysymen tanysty. Qazir eki eldiń azamattary «Qarasý», «Sortóbe», «Aýqatty» beketteri arqyly shekaradan ótkizilýde. Jańartylǵan ótkizý beketi jyl sońynda paıdalanýǵa beriledi. Qaıta jańartý jumystary aıaqtalǵan soń, «Qordaı» beketi táýligine 50 myń adamdy ótkize alady.
Óńirde «Merki–Býrylbaıtal», «Kúrti–Býrylbaıtal» jáne «Balqash- Býrylbaıtal» sııaqty taǵy birneshe aýqymdy joba júzege asyrylyp jatyr. Búgingi tańda nysandarda qurylys jumystary qarqyn alǵan. Joba elimizdiń ońtústik jáne ortalyq óńirlerin baılanystyryp, olardyń tranzıttik jáne týrıstik áleýetin arttyrýǵa septigin tıgizedi. «Merki – Býrylbaıtal» jolynyń 262 shaqyrymynda qozǵalys bıyl ashylýy tıis. «Kúrti – Býrylbaıtal» jáne «Balqash–Býrylbaıtal» joldarynda qaıta jańartý jumystary aıaqtalǵan soń, Almatydan Balqashqa deıin 4-5 saǵattyń ishinde jetýge bolady.
Eske sala keteıik, bıyl qurylys jáne qaıta jańartý jumystarymen respýblıkalyq mańyzǵa ıe avtojoldardyń 4 myń shaqyrymy qamtylyp, onyń 2600 shaqyrymynda qozǵalys jandanady dep josparlanyp otyr.
