Bıyl elimizdegi astyq túsimi byltyrǵydan kem boljanbaıdy

ASTANA. QazAqparat - Bıylǵy jyly elimizde kútiletin astyq túsimi ótken jylǵydan tómen boljanbaıdy. Bul týraly búgin brıfıngte «QazAgro» holdınginiń basqarýshy dırektory Qanat Jaýymbaev málim etti.

«Qatelespesem, bizde ótken jyly shamamen18 mln. tonnaǵa jýyq astyq jınaldy. Sondyqtan da, eger aýa-raıy qolaıly bolsa, bıylǵy ónim kólemi de byltyrǵy deńgeıden kem bolmaýy kerek», - dedi Qanat Jaýymbaev. Onyń aıtýyna qaraǵanda, eginniń jıyn-teriminde aýa-raıy jaǵdaıy da mańyzdy ról atqarady. Degenmen, aýa-raıy qazir elimizdiń óńirlerinde árkelki. «Máselen, Qostanaı oblysyn alyp qarasaq, onyń keı bóliginde ylǵal jetkilikti bolsa, endi bir bóligi áli qýańshylyqty bastan keshirýde. Degenmen, elimizde aýa raıy osy kúıde turaqtalsa bári oıdaǵydaı bolyp, astyq ta boljanǵandaı jınalýy tıis», - dedi Q.Jaýymbaev.

Toqtala ketitin jaıt, byltyr elimizde 18 mln. 231 myń tonna astyq pen burshaq daqyldary jınalsa, sonyń 76,5 paıyzyn bıdaı quraǵan.