Bıyl elimizde jatyr moıny obyryna qarsy egý jumystary bastalady

Bul týraly búgin QR DSM janyndaǵy emdelýshilerdiń quqyn qorǵaý jónindegi qoǵamdyq keńestiń otyrysynan keıingi brıfıngte Memlekettik sanıtarlyq-epıdemıologııalyq qadaǵalaý komıtetiniń basqarma bastyǵy Aıtmaǵambet Jolshorınov aıtty.

«Qazirgi kezde áıelder arasynda qaterli isik aýrýlaryn azaıtý úshin bıyldan bastap vaktsınalaý máselesin kóterip otyrmyz. Atap aıtqanda, osy jyly 11-12 jastaǵy qyzdarǵa adamnyń papılloma vırýsyna qarsy egý jumystaryn bastamaqpyz. Bul turǵyda qazirgi kezde daıyndyq jumystary júrgizilip jatyr. Birinshiden, osy oraıda medıtsına mamandary oqytylýda, ekinshiden, egetin vaktsınalar tıisti tekserýlerden ótip, onyń qaýipsizdigi anyqtaldy»,-dedi ol. Belgili bolǵandaı, vırýsqa qarsy egiletin bul vaktsınalardyń 2 túri de Dúnıejúzilik densaýlyq saqtaý uıymynyń sertıfıkatyn alǵan. Eki vaktsınanyń biri Nıderlandyda, al ekinshisi Belgııada shyǵarylady.

A. Jolshorınovtyń sózine qaraǵanda, atalǵan ekpe ata-analarynyń ruqsatymen erikti túrde egiledi. «Bul vaktsına qyzdarǵa birinshi kúni, sodan keıin 2 aı jáne 6 aı tolǵanda egiledi. Osy kezeńde vaktsınalanǵannan soń, ımmýnıtet paıda bolady»,-deıdi ol.

Bastapqy kezeńde atalǵan sharalarmen elimizdiń tórt óńiri qamtylmaq, ıaǵnı Atyraý men Pavlodar oblystary, sondaı-aq Astana men Almaty qalalarynda iske asyrylady.

«Bul vaktsınalar AQSh-ta, Ulybrıtanııada, Belgııada jáne basqa da elderde kóp jyldan beri (shamamen 9 jyl) paıdalanylyp keledi. Olardyń statıstıkasy boıynsha osynyń arqasynda indet deńgeıi 2,5 esege deıin tómendegen eken.