Bıyl elimizde tutynýshylyq ımport qandaı deńgeıge ósti
«Naqty sektordyń damý serpini Ulttyq banktiń esepteýlerine sáıkes keledi. 2021 jylǵy
9 aıdyń qorytyndysy boıynsha Ulttyq banktiń optımıstik stsenarııine súıene otyryp, ІJÓ ósýi 3,4% boldy. Ekonomıkanyń qalpyna kelýi shıkizat naryqtaryndaǵy álemdik baǵalardyń ósýi jáne karantındik shekteýlerdiń jeńildetilýi aıasynda jalǵasty. Óńdeý ónerkásibi, saýda, qurylys, aqparat jáne baılanys salalary, memlekettik sektor joǵary ósý qarqynyn kórsetip otyr. Sonymen qatar 2020 jylǵy naýryzdan bastap alǵash ret kólikte oń ósý qarqyny baıqaldy. Optımıstik stsenarııge sáıkes, bıylǵy jyly ekonomıka 3,7-4%-ǵa ósedi», - delingen Ulttyq bank málimetinde.
Epıdemıologııalyq ahýaldyń jaqsarýy aıasynda tutynýshylyq belsendilik senimdi túrde qalpyna kelip jatyr. 2021 jylǵy shilde-tamyzda birshama baıaýlaǵannan keıin, bólshek saýda aınalymynyń ósý qarqyny qalpyna kelip, 2021 jylǵy qyrkúıekte jyldyq mánde 5,6% boldy.
«Bólshek saýda aınalymynyń qurylymynda azyq-túlikke jatpaıtyn taýarlar aınalymynyń ósý aımaǵyna bir mezgilde shyǵýymen tamaq ónimderi saýdasynyń neǵurlym belsendi serpini baıqaldy. Іshki suranystyń serpindi qalpyna kelýi nomınaldy jáne naqty kiristiń ósýimen nyǵaıtyldy. 8 aıda nomınaldy kiristiń ósýi 12,9%, naqty ósý – 4,9% boldy. Joǵary suranys tutynýshylyq taýarlar ımportynyń jyldamdaýyna áser etedi. 2021 jylǵy 8 aıda tutynýshylyq ımport 7,7 mlrd AQSh dollaryna deıin 23,9%-ǵa ósti», - dep atalyp ótken Ulttyq bank habarlamasynda.
Aıta keteıik, QR Ulttyq banki bazalyq mólsherlemeni 9,75%-ǵa deıin kóterý týraly sheshim qabyldady.