Bıyl elimizde turǵyn úı satyp alý qarqyny byltyrǵyǵa qaraǵanda 14,7 paıyzǵa tómendegen
ASTANA. QazAqparat - QR Ulttyq ekonomıka mınıstrligi Statıstıka komıtetiniń derekterine qaraǵanda, 2014 jylǵy qańtar-tamyzda turǵyn úıdi satyp alý-satý mámileleriniń sany 100 986 qurady. Bul kórsetkish ótken jylǵy tıisti kezeńmen salystyrǵanda 14,7 paıyzǵa az.
Sonymen qatar, komıtettiń taratqan aqparatyna sáıkes, 2014 jylǵy tamyzda turǵyn úıdi satyp alý-satýdyń tirkelgen mámileleriniń sany 14 793 qurady. Atalǵan kórsetkish ótken aımen salystyrǵanda 0,5 paıyzǵa azaıǵan.
Jalpy, tamyz aıynda turǵyn úılerdi satyp alý-satý mámileleri eń kóp Almaty qalasynda (1 684) tirkelgen. Budan keıingi orynda Qaraǵandy oblysynda - 1 657, sosyn Shyǵys Qazaqstan oblysynda - 1 620 mámileler jasalǵan. Tamyz aıynda turǵyn úı satylymynyń eń az kórsetkishi Atyraý oblysyna tıesili, esepti kezeńde atalǵan óńirde jasalǵan mámileler 286-ny qurap otyr. Al Astana qalasyndaǵy baspana satylymyna qatysty jasalǵan mámileler tamyz aıynda 856-ǵa jetken.
